కలం, స్పోర్ట్స్ : విరాట్ కోహ్లీని సవాల్ చేసే శక్తి కేవలం విరాట్ కోహ్లీకి మాత్రమే ఉందని మాజీ క్రికెటర్ ఇర్ఫాన్ పఠాన్ (Irfan Pathan) కొనియాడారు. ఐపీఎల్ చరిత్రలో 9,000 పరుగుల మైలురాయిని చేరుకున్న తొలి ఆటగాడిగా కోహ్లీ (Virat Kohli) సరికొత్త చరిత్ర సృష్టించిన నేపథ్యంలో పఠాన్ ఈ ఆసక్తికర వ్యాఖ్యలు చేశారు. ఈ 9 వేల పరుగుల రికార్డు కోహ్లీకి ఒక గమ్యం కాదని, అది కేవలం ఒక మెట్టు మాత్రమేనని ఆయన (Irfan Pathan) అభిప్రాయపడ్డారు.
అరుణ్ జైట్లీ స్టేడియంలో ఢిల్లీ క్యాపిటల్స్తో జరిగిన మ్యాచ్లో కోహ్లీ ఈ అరుదైన ఘనతను అందుకున్నారు. తన కెరీర్లో ఎన్నో కీలక జ్ఞాపకాలు ఉన్న ఇదే మైదానంలో ఈ రికార్డు నమోదు కావడం విశేషం. ఈ మ్యాచ్లో ఢిల్లీ నిర్దేశించిన స్వల్ప లక్ష్యాన్ని ఆర్సీబీ బ్యాటర్లు ఎంతో సునాయాసంగా ఛేదించారు. ముఖ్యంగా కోహ్లీ ఎక్కడా ఒత్తిడికి లోనుకాకుండా, ఆఖర్లో వరుసగా రెండు సిక్సర్లు బాది అజేయంగా నిలిచి జట్టుకు విజయాన్ని అందించారు.
ఈ ఇన్నింగ్స్లో కోహ్లీ ఆచితూచి ఆడుతూనే అవసరమైనప్పుడు తన దూకుడును ప్రదర్శించారు. ప్రస్తుత సీజన్లో కోహ్లీ అద్భుతమైన ఫామ్లో కొనసాగుతూ ఆరెంజ్ క్యాప్ రేసులో ముందు వరుసలో ఉన్నారు. అనవసరమైన రిస్క్ తీసుకోకుండా, జట్టు అవసరాలకు తగ్గట్లుగా ఆయన ఆడుతున్న తీరు ఆర్సీబీ టాప్ ఆర్డర్కు కొండంత బలాన్నిస్తోంది. 8 సెంచరీలు, ఎన్నో అర్ధసెంచరీలతో నిలకడగా పరుగులు సాధిస్తూ విరాట్ తన ఫిట్నెస్ను, పట్టుదలను మరోసారి నిరూపించుకున్నారు.
