కలం, వెబ్డెస్క్: టెక్ దిగ్గజం అమెజాన్ (Amazon) అన్నంతపనీ చేసింది. గత కొంతకాలంగా ఉద్యోగాల కోత గురించి చెబుతున్న ఈ టెక్ జెయింట్ దీనిపై బుధవారం ప్రకటించింది. ప్రపంచవ్యాప్తంగా తమ సంస్థల్లో పనిచేస్తున్న ఉద్యోగుల్లో 16వేల మందిని తొలగిస్తున్నట్లు వెల్లడించింది. ఈ మేరకు ఉద్యోగులకు మెయిల్ పంపామని, మరో అవకాశం చూసుకునే వరకు వేతనంతో కూడిన మూన్నెళ్ల గడువును ఇస్తున్నామని పేర్కొంది.
మొదట తప్పు మెయిల్..
యూఎస్, కెనడా, కోస్టారికా లోని అమెజాన్ (Amazon) ఉద్యోగులకు మంగళవారం సంస్థ నుంచి ఒక మెయిల్ వెళ్లింది. అందులో ఉద్యోగులను తొలగిస్తున్నట్లు పేర్కొనడంతోపాటు కారణాలు తెలిపింది. ఈ విషయం బయటకు రావడంతో అమెజాన్ స్పందించింది. అది, అనుకోకుండా పంపిన మెయిల్ అంటూ వివరణ ఇచ్చింది. ఆ మెయిల్ను తొలగించింది. దీంతో ఉద్యోగులు సంతోషించారు. అయితే, వాళ్ల ఆనందాన్ని మరుసటి రోజే ఆవిరి చేసింది.16వేల మందిని తొలగిస్తున్నట్లు అధికారికంగా ప్రకటించింది. కంపెనీలోని బ్యూరోక్రసీ వ్యవస్థను తగ్గించడానికి, నిర్ణయం తీసుకోవడంలో వేగాన్ని పెంచడానికి ఈ చర్య తీసుకున్నట్లు అమెజాన్ తెలిపింది.
దీనిపై అమెజాన్ సీనియర్ వైస్ ప్రెసిడెంట్ బేత్ గాలెట్టీ మాట్లాడారు. ‘ప్రతి నెలలోనూ ఇన్ని ఉద్యోగాలు కోత పెట్టాలనే ప్రణాళిక ఏమీ లేదు. సంస్థ అభివృద్ధికి తీసుకునే నిర్ణయాల్లో ఇదొకటి. గత అక్టోబర్లో 14వేల మందిని తొలగించాం. ఇప్పుడు కొన్ని విభాగాల్లో మాత్రమే కోత వేశాం’ అని అన్నారు. తొలగింపులకు కచ్చితమైన కారణం చెప్పనప్పటికీ ఏఐ వల్లే ఉద్యోగాల్లో కోత ఉంటుందని గతంలో సంస్థ అత్యున్నత అధికారులు వెల్లడించారు.
ప్రాజెక్ట్ డాన్..
ఉద్యోగులకు పంపిన తొలగింపు మెయిల్లో ‘సెండ్ ప్రాజెక్ట్ డాన్ ఈమెయిల్’ అనే పేరుతో మెయిల్ పంపారు. ప్రాజెక్ట్ డాన్ పదాన్ని కోతలకు వాడిన కోడ్గా భావిస్తున్నారు. అమెజాన్ వెబ్ సర్వీసెస్(AWS) సీనియర్ వైస్ ప్రెసిడెంట్ ఈ డ్రాఫ్ట్ మెయిల్ రాశారు. కాగా, అమెజాన్లో ప్రస్తుతం వివిధ విభాగాల్లో దాదాపు 15లక్షల మంది ఉద్యోగులు ఉన్నారు. ఇందులో 3,50,000 మంది కార్పొరేట్ సెక్టార్ వాళ్లే. అయితే, ఏ రంగంలో ఎంత మందిని తొలగించారనే విషయాన్ని అమెజాన్ చెప్పలేదు.
