కలం, వెబ్డెస్క్: నాలుగు దశాబ్దాలకు పైగా రాజకీయ ప్రస్థానం.. అనేక నాటకీయ పరిణామాలకు కేరాఫ్ అడ్రస్.. ఆరుసార్లు డిప్యూటీ సీఎం.. వేర్వేరు పార్టీలతో కలసి ప్రయాణం.. వెరసి మహారాష్ట్ర రాజకీయాల్లో విలక్షణ నేత అజిత్ పవార్(66) (Ajit Pawar). రాజకీయాల్లో తనకు శాశ్వత మిత్రులు, శాశ్వత శత్రువులు లేరని చెప్పే అజిత్.. ముఖ్యమంత్రి కావాలనే తన కోరిక తీరకుండానే కనుమరుగయ్యారు. జిల్లా స్థానిక సంస్థల ఎన్నికల ప్రచారానికి వెళుతూ ఈ ఉదయం(28 జనవరి, 2026) విమాన ప్రమాదంలో మరణించారు. ఇది మహారాష్ట్ర రాజకీయాల్లో భారీ కుదుపు, ఊహించని మలుపు.
అంచెలంచెలుగా ఎదుగుతూ..
మహారాష్ట్రలోని అహ్మద్నగర్ జిల్లా దేవ్లాలి ప్రవరలో 1959, జులై 22న జన్మించిన అజిత్ అనంతరావ్ పవార్(Ajit Pawar) రాజకీయ ప్రస్థానం 1982లో ప్రారంభమైంది. సొంత బాబాయ్ శరద్ పవార్ బాటలో రాజకీయాల్లో అడుగుపెట్టారు. ఆయన ఆశీర్వాదాలతో మొదట కోఆపరేటివ్ షుగర్ ఫ్యాక్టరీ బోర్డు మెంబర్ అయ్యారు. ఆ తర్వాత పుణే జిల్లా సహకార బ్యాంక్ (పీడీసీ) చైర్మన్గా ఎన్నికయ్యారు. పదహారేళ్ల పాటు ఇదే పదవిలో నిరాటంకంగా కొనసాగారు. ఆ తరువాత ఛత్రపతి షుగర్ ఫ్యాక్టరీ డైరెక్టర్గా పనిచేశారు. అనంతరం ఛత్రపతి బజార్కు అధ్యక్షుడయ్యారు. అదే సమయంలో పుణే జిల్లా వికాస్ ప్రతిష్ఠాన్కు ట్రస్టీగా కూడా పనిచేశారు. 1991లో బారామతి స్థానం నుంచి ఎంపీగా గెలిచి లోక్సభలో అడుగుపెట్టారు. అయితే, నాలుగు నెలల్లోనే బాబాయ్ శరద్ పవార్ కోసం రాజీనామా చేశారు. ఆ స్థానం నుంచి పోటీ చేసిన శరద్ పవార్ గెలిచి అప్పటి ప్రధాని పీవీ మంత్రివర్గంలో రక్షణ మంత్రి అయ్యారు.
ఎనిమిది సార్లు ఎమ్మెల్యే.. ఆరుసార్లు డిప్యూటీ..
కేంద్ర రాజకీయాల్లో బాబాయ్ శరద్ పవార్ వెళ్లడంతో ఖాళీ అయిన బారామతి అసెంబ్లీ స్థానం నుంచి 1991లో జరిగిన ఉప ఎన్నికలో గెలిచిన అజిత్ పవార్ ఆ తర్వాత తిరిగి చూసుకోలేదు. అనంతరం వరుసగా ఏడు సార్లు అదే స్థానం నుంచి మహారాష్ట్ర అసెంబ్లీలో అడుగుపెట్టారు. 91, 95 ఎన్నికల్లో కాంగ్రెస్ నుంచి ఎన్నికైన ఆయన.. ఆ తర్వాత నేషనలిస్ట్ కాంగ్రెస్ పార్టీ (NCP) నుంచి విజయం సాధించారు. 1999లో ఎన్నికయ్యాక మొదటిసారి రాష్ట్ర మంత్రి అయ్యారు. విలాస్రావ్ దేశ్ముఖ్ మంత్రివర్గంలో నీటి పారుదల, గ్రామీణాభివృద్ధిశాఖలకు మంత్రిగా పనిచేశారు.2004లో గెలిచాక జలవనరుల శాఖ మంత్రి అయ్యారు. పృథ్వీరాజ్ చవాన్ నేతృత్వంలో ఏర్పడిన కూటమి ప్రభుత్వంలో 2010లో తొలిసారి డిప్యూటీ సీఎం అయ్యారు అజిత్. అనంతరం మరో ఐదుసార్లు ఉపముఖ్యమంత్రి అయ్యారు.
బాబాయ్తో విభేదాలు..
2019 అసెంబ్లీ ఎన్నికల్లో శరద్ పవార్ నేతృత్వంలోని ఎన్సీపీకి అధిక స్థానాలు వచ్చాయి. అయినా, కాంగ్రెస్కు సీఎం పదవి ఇవ్వడాన్ని అజిత్ జీర్ణించుకోలేకపోయారు. బాబాయ్ నిర్ణయాన్ని వ్యతిరేకిస్తూ బహిరంగంగా ప్రకటనలు చేశారు. విభేదాలు తీవ్రం కావడంతో ఎన్సీపీ నుంచి బయటకు వచ్చారు. బీజేపీకి మద్దతు ఇచ్చారు. దాంతో బీజేపీ నుంచి దేవేంద్ర ఫడ్నవిస్ ముఖ్యమంత్రి కాగా, అజిత్ డిప్యూటీ సీఎం అయ్యారు. అయితే, ఈ ప్రభుత్వం కేవలం మూడు రోజుల్లోనే కుప్పకూలింది. దీంతో మళ్లీ బాబాయ్ చెంతన చేరారు అజిత్. అనంతరం శివసేన నేత ఉద్ధవ్ఠాక్రేతో కలసి ఎన్సీపీ ఏర్పాటుచేసిన మహా వికాస్ ఆఘాడీ కూటమిలో పనిచేశారు. మళ్లీ డిప్యూటీ సీఎం అయ్యారు. రెండున్నరేళ్లలో ఈ ప్రభుత్వం కూలిపోయింది.
అనంతరం ఎన్సీపీ నుంచి బయటకు వచ్చి బీజేపీ నేతృత్వంలోని మహాయుతి కూటమిలో చేరారు. 2022లో ఏక్నాథ్ షిండే సారథ్యంలో ఏర్పడిన మంత్రివర్గంలో డిప్యూటీ సీఎం అయ్యారు. 2024లో జరిగిన ఎన్నికల్లో మహాయుతి మళ్లీ విజయం సాధించింది. ఈసారి అజిత్ పవార్కు సీఎం పీఠం దక్కుతుందని అందరూ భావించారు. అయితే, దేవేంద్ర ఫడ్నవిస్ సీఎం కాగా, అజిత్ మళ్లీ డిప్యూటీగానే మిగిలిపోయారు. అలా, వేర్వేరు కూటముల్లో (కాంగ్రెస్–ఎన్సీపీ; కాంగ్రెస్–శివసేన–ఎన్సీపీ; బీజేపీ–శివసేన–ఎన్సీపీ) నుంచి ఆరుసార్లు ఉపముఖ్యమంత్రి అయి రికార్డు సృష్టించారు.
మాస్ లీడర్..
మహారాష్ట్ర రాజకీయాల్లో అజిత్ పవార్ మాస్ లీడర్గా పేరు పొందారు. బాబాయ్ అండతో రాజకీయాల్లో అడుగుపెట్టినప్పటికీ అనేక సార్లు ఆయనతో విభేదించారు. వేరు పడ్డారు. మళ్లీ కలసి పోయారు. ఆ క్రమంలో సొంతంగా కేడర్ పెంచుకున్నారు. తనకంటూ వర్గాన్ని ఏర్పాటుచేసుకున్నారు. 2022లో బాబాయ్తో విభేదించాక తన వర్గం ఎమ్మెల్యేలతో కలసి వేరు కుంపటి పెట్టారు. అజిత్ వైపే ఎక్కువ మంది ఎమ్మెల్యేలు ఉండడంతో పార్టీతోపాటు, గుర్తు కూడా అతనికే సొంతమైంది.
అయితే, గత లోక్సభ ఎన్నికల్లో బారామతి స్థానం నుంచి బాబాయ్ శరద్ పవార్ కూతురు సుప్రియా సూలేపై తన భార్యను పోటీకి నిలిపారు. ఆ ఎన్నికల్లో అజిత్ సతీమణి ఓటమి చెందారు. అలా పోటీకి దించడం తప్పని తర్వాత అజిత్ పశ్చాత్తాపపడ్డారు. కాగా, అర్ధరాత్రి డిప్యూటీ సీఎంగా ప్రమాణం చేయడం నుంచి అనేక నాటకీయ సంఘటనలకు కారణమైన అజిత్ పవార్ ఏనాటికైనా సీఎం కావాలని కలగన్నారు. ఆ కల తీరకుండానే విమాన ప్రమాదంలో అర్ధాంతరంగా నిష్క్రమించారు.
Read Also: అజిత్ పవార్ మృతి.. సీఎం ఫడ్నవీస్ భావోద్వేగ ట్వీట్
Follow Us On: Instagram
