కలం, వెబ్డెస్క్: బారామతి వద్ద బుధవారం జరిగిన విమాన ప్రమాదంలో మహారాష్ట్ర డిప్యూటీ సీఎం అజిత్ పవార్ మృతి చెందిన సంగతి తెలిసిందే. ఆయన అంత్యక్రియలు గురువారం ముగిశాయి. ఈ కార్యక్రమానికి కేంద్ర హోంమంత్రి అమిత్ షా సహా అనేక మంది ప్రముఖులు హాజరయ్యారు. ఈ క్రమంలో ఇప్పుడు కొత్త అంశం తెరపైకి వచ్చింది. అదే.. మహా కేబినెట్లో అజిత్ స్థానాన్ని ఎవరితో భర్తీ చేస్తారు? అనే ప్రశ్న. ప్రస్తుతానికి సమాధానంగా సునేత్ర పవార్ (Sunetra Pawar) పేరు వినిపిస్తోంది.
అజిత్ పవార్ భార్య అయిన సునేత్ర ప్రస్తుతం రాజ్యసభ ఎంపీగా ఉన్నారు. అజిత్ సతీమణి కావడం, రాజకీయాల్లో అనుభవం ఉండడంతో ఆమెను కేబినెట్లోకి తీసుకునేలా అధికార మహాయుతిని కోరాలని ఎన్సీపీ భావిస్తోంది. అజిత్ స్థానంలో డిప్యూటీ సీఎంగా పదవి ఇవ్వాలని అడిగేందుకు సిద్ధమవుతోంది.
విశ్వసనీయ సమాచారం ప్రకారం.. ఇప్పటికే సునేత్ర పవార్ (Sunetra Pawar) తో ఎన్సీపీ సీనియర్ నేతలు ప్రఫుల్ పటేల్, ఛగన్ భుజ్బల్, ధనంజయ ముండే, సునీల్ తట్కరే అంతర్గతంగా సమావేశమై చర్చించారు. అజిత్ దాదా మరణంతో ఖాళీ అయిన బారామతి నుంచి సునేత్ర బరిలోకి దిగడంతో పాటు, కేబినెట్లో ఆయన నిర్వహించిన డిప్యూటీ సీఎం పదవిని అడగాలని ప్రణాళికలు సిద్ధం చేసినట్లు సమాచారం. ఈ విషయంపై చర్చించేందుకు, భవిష్యత్ కార్యాచరణపై నిర్ణయం తీసుకునేందుకు ఎన్సీపీ నేతలు ముఖ్యమంత్రి దేవేంద్ర ఫడ్నవీస్ను కలవనున్నారు.
శరద్ పవార్ అంగీకరిస్తారా?
ఎన్సీపీకి ప్రస్తుత వర్కింగ్ ప్రెసిడెంట్ ప్రఫుల్ పటేలే నాయకత్వం వహించే అవకాశం ఉంది. అయితే, ఎన్సీపీ, ఎన్సీపీ(ఎస్పీ)ల విలీనం ఇప్పుడు అన్నింటికంటే ముఖ్యం. రెండేళ్ల కిందట బాబాయ్ శరద్ పవార్(Sharad Pawar) తో విభేదించి.. ఎక్కువ మంది ఎమ్మెల్యేలను తనవైపు తీసుకెళ్లి, పార్టీ పేరును, గుర్తును అజిత్ సొంతం చేసుకున్న సంగతి తెలిసిందే. అయితే, ఇటీవలి మహారాష్ట్ర పుర ఎన్నికల సమయంలో బాబాయ్తో అజిత్ పవార్ కలసిపోయారు. అంతేకాదు, ఎన్సీపీ, ఎన్సీపీ(ఎస్పీ) కలసి కొన్ని పురపాలికల్లో పోటీ చేశాయి.
అప్పటి నుంచే రెండు పార్టీల విలీనంపై చర్చలు జరుగుతున్నాయి. అయితే, రెండూ కలిశాక మహాయుతిలో చేరేందుకు శరద్ పవార్ అంగీకరిస్తారా? అనేదే అసలు ప్రశ్న. ఎందుకంటే ప్రస్తుతం శరద్ పవార్ పార్టీ కాంగ్రెస్ నేతృత్వంలోని మహా వికాస్ ఆఘాడీ కూటమిలో ఉంది. విలీనం తర్వాత అధికార మహాయుతిలో కొనసాగుతారా? లేక ప్రతిపక్షంలోకి వెళతారా? అనేది పజిల్గా మారింది. ఇది తేలితేనే సునేత్ర పవార్కు మంత్రి పదవి ఖాయమవుతుందని భావిస్తున్నారు.
Read Also: నందినగర్ ఇంట్లో పోలీసులు.. భద్రత, విచారణ ఏర్పాట్లపై పరిశీలన
Follow Us On: Instagram
