‘స్థానికం’పై బీఆర్ఎస్(BRS) కాడి వదిలేసినట్లే కనిపిస్తోంది. పార్టీ గుర్తుపై జరగని ఈ ఎన్నికలను అంత సీరియస్ గా తీసుకోకూడదని ఆలోచిస్తున్నట్లు తెలుస్తోంది. తాజాగా పార్టీ శ్రేణులకు చేసిన దిశానిర్దేశంలో బీఆర్ఎస్ వర్కింగ్ ప్రెసిడెంట్ కేటీఆర్(KTR) చేసిన వ్యాఖ్యలు దీనికి బలం చేకూరుస్తున్నాయి. పార్టీ ముఖ్యలు, ద్వితీయ శ్రేణి నాయకులు, కార్యకర్తలతో ఇటీవల కేటీఆర్ సమావేశమయ్యారు. ఈ సందర్భంగా స్థానిక ఎన్నికలపై పార్టీ సన్నద్ధతను, వ్యూహాన్ని, ఎదురువుతున్న ఇబ్బందులను ఆయన చర్చించారు. స్థానిక ఎన్నికల్లో సహజంగానే అధికార పార్టీకి ఎక్కువ అవకాశం ఉంటుందని, అందువల్ల పార్టీ గుర్తులపై జరగని ఈ ఎన్నికలను అంతగా పట్టించుకోవాల్సిన అవసరం లేదని సమావేశంలో భావించినట్లు సమాచారం. అలాగే పల్లెల్లో పార్టీ తరఫున బరిలోకి దిగేందుకు ఆశావహులు ఎక్కువ మంది ఉంటున్నారని, వీరిలో ఎవరిని కాదన్నా ఇబ్బందే అని కూడా ప్రస్తావనకు వచ్చినట్లు తెలుస్తోంది. దీంతో ఎవరు పోటీ చేయాలనే విషయాన్ని స్థానిక నాయకులకే వదిలేయాలని బీఆర్ఎస్ నిర్ణయించిందంటున్నారు. దీనికి తగినట్లే ‘స్థానికం సరే.. జీహెచ్ఎంసీ ఎన్నికల్లో(GHMC Elections) గట్టిగా కొట్లాడుదాం’ అని కేటీఆర్ దిశానిర్దేశం చేసినట్లు చెబుతున్నారు.
ఎన్నికలు ఎప్పుడో తెలియకున్నా..:
గ్రేటర్ హైదరాబాద్ మున్సిపల్ కార్పొరేషన్(జీహెచ్ఎంసీ) ప్రస్తుత పాలకమండలి పదవీ కాలం వచ్చే ఏడాది ఫిబ్రవరి 10తో ముగియనుంది. అంటే దాదాపు రెండు నెలల సమయం ఉంది. కానీ, పాలకమండలి పదవీకాలం ముగిసిన వెంటనే ఎన్నికలు జరుగుతాయా? అంటే చెప్పలేని పరిస్థితి. కారణం.. ఇటీవలే జీహెచ్ఎంసీని బృహత్ మహా నగరంగా విస్తరించాలని ప్రభుత్వం తీసుకున్న నిర్ణయం. జీహెచ్ఎంసీకి అనుబంధంగా ఉన్న కోర్ అర్బన్ ఏరియాను కూడా కలిపి బృహత్ మహానగరంగా విస్తరించాలనేది ప్రభుత్వ ప్లాన్. దీని ప్రకారం 27 నగర, పట్టణ పురపాలక సంఘాలు జీహెచ్ఎంసీలో విలీనం కానున్నాయి. దీని వల్ల బృహత్ మహానగర పరిధిలోకి 28 శాసనసభ స్థానాలు, ఆరు పార్లమెంట్ స్థానాలు రానున్నాయి.
అయితే, ఈ విలీనం అంత త్వరగా అవుతుందో లేదో తెలియదు. కాబట్టి, జీహెచ్ఎంసీ ఎన్నికలు(GHMC Elections) వెంటనే జరగుతాయని చెప్పలేం. ఏవైనా అడ్డంకులు ఎదురైతే ప్రభుత్వం స్పెషల్ ఆఫీసర్ ను నియమించి, పాలన బాధ్యతలు అప్పగించొచ్చు. అయితే, జీహెచ్ఎంసీ ఎన్నికలు ఎప్పుడు జరుగుతాయో తెలియకపోయినా వాటిపైన ఇప్పటి నుంచే ప్రత్యేక దృష్టి పెట్టాలని బీఆర్ఎస్ ప్రణాళికలు సిద్ధం చేస్తోంది. గత జీహెచ్ఎంసీ ఎన్నికల్లో 55 స్థానాలు గెలిచి మేయర్ పీఠం దక్కించుకోగా, ఈసారి మెజార్టీ సంఖ్యలో గెలవాలని వ్యూహం రచిస్తున్నట్లు తెలుస్తోంది.
పట్టు నిలుపుకోవడం.. అధికారం పట్టడం:
జీహెచ్ఎంసీ ఎన్నికలను ప్రతిష్ఠాత్మకంగా తీసుకోవాలని కేటీఆర్ నిర్దేశించడం వెనక అనేక కారణాలు కనిపిస్తున్నాయి. అందులో మొదటిది శాసనసభ స్థానాలు. విస్తరించబోయే బృహత్ మహానగరం పరిధిలోకి ఏకంగా 28 స్థానాలు వస్తాయి. అందులో అధికశాతం వాటిని కైవసం చేసుకున్న పార్టీకి అధికారం దక్కే అవకాశం ఉంది. వాస్తవానికి గత ఎన్నికల్లో ప్రస్తుత జీహెచ్ఎంసీ పరిధిలోని శాసనసభ స్థానాల్లో గోషామహల్ బీజేపీ ఖాతాలోకి చేరగా మిగిలిన వాటిని బీఆర్ఎస్, ఎంఐఎం పంచుకున్నాయి. జిల్లాల్లో చతికిలబడినప్పటికీ నగరంలో బీఆర్ఎస్ గణనీయమైన సీట్లు సాధించింది. ఏకంగా 16 స్థానాలు గెల్చుకుంది. అయినా, అధికారానికి దూరమైంది.
అయితే, ఒకప్పటి తమ పట్టును నిలుపుకోవాలని, విస్తరించేబోయే జీహెచ్ఎంసీలోనూ అధిక స్థానాలు గెలుచుకొని అధికారానికి మార్గం వేసుకోవాలని బీఆర్ఎస్ నిర్ణయించుకుంది. మరోవైపు, రాష్ట్రానికి వెన్నెముక జీహెచ్ఎంసీ. ఇక్కడ ఆదాయమే రాష్ట్రానికి కీలకం. అనేక జాతీయ, అంతర్జాతీయ సంస్థలు, ప్రభుత్వ కార్యాలయాలు, ఫిల్మ్ ఇండస్ట్రీ.. అనేకం ఇక్కడే ఉన్నాయి. అందువల్ల మొదట జీహెచ్ఎంసీ ఎన్నికల్లో సత్తా చాటితే ఆ ప్రభావం కచ్చితగా శాసనసభ ఎన్నికలపై అన్ని విధాలుగా ఉంటుంది. అంతేకాదు, పార్టీ గుర్తుపై జరిగే ఈ ఎన్నికలు తమ సత్తా ఎంత మేరకు ఉందో ముందుగానే చెప్తాయి. అందుకే జీహెచ్ఎంసీ ఎన్నికలను ప్రతిష్టాత్మకంగా తీసుకోవాలని బీఆర్ఎస్ భావిస్తోంది.
అయితే, నగరంలో మారిన పరిస్థితులు, ఇటీవల జూబ్లీహిల్స్ ఎన్నికల్లో ఓటమి రాబోయే జీహెచ్ఎంసీ ఎన్నికలు బీఆర్ఎస్ కు అంత సులభంగా కాదని చెప్పకనే చెబుతున్నాయి. అన్నింటికంటే ముఖ్యంగా నగరంలో భారీ సంఖ్యలో ఉన్న సెటిలర్లు ఇప్పటికే బీఆర్ఎస్ కు దూరమైనట్లు కనిపిస్తోంది. జూబ్లీహిల్స్ ఎన్నికల్లో టీడీపీ పరోక్షంగా కాంగ్రెస్ కు మద్దతు ఇవ్వడం, జనసేన బీజేపీతో జత కట్టడం, ఆర్థికంగా బలమైన కమ్మ సామాజిక వర్గం కాంగ్రెస్ వెంట నడవడం బీఆర్ఎస్ కు ఇబ్బందికర పరిణామాలే. వీటన్నింటికి తోడు అధికార బలాన్ని ఎదుర్కొని జీహెచ్ఎంసీలో పాగా వేయడం అనుకున్నంత సులభం కాదు. పార్టీ గుర్తుపై జరిగే జీహెచ్ఎంసీ ఎన్నికల్లో ఒకవేళ బీఆర్ఎస్ సత్త చాటితే మాత్రం అది కచ్చితంగా రాబోయే శాసనసభ ఎన్నికల్లో అధికారాన్ని దక్కేలా చేస్తుందనే బీఆర్ఎస్ ఆశ, ఆకాంక్ష నిజమవుతుందో లేదో తెలియాలంటే మరికొన్ని రోజులు వేచి చూడాల్సిందే.
Read Also: మహిళల జనేంద్రియాల మ్యుటిలేషన్.. కేంద్రం వైఖరిని కోరిన సుప్రీం
Follow Us On: X(Twitter)
