కలం, వెబ్ డెస్క్ : తెలంగాణ రాజకీయాలు (Telangana Politics) ప్రస్తుతం అత్యంత దారుణమైన స్థితికి చేరుకున్నాయని, అభివృద్ధి చర్చ పోయి అసభ్య పదజాలమే రాజ్యమేలుతోందని కేంద్ర హోం శాఖ సహాయ మంత్రి బండి సంజయ్ (Bandi Sanjay) మండిపడ్డారు. రాష్ట్రంలో అధికార కాంగ్రెస్, ప్రతిపక్ష బీఆర్ఎస్ పార్టీల మధ్య సాగుతున్న విమర్శల పర్వం ప్రజాస్వామ్యానికే మచ్చగా మారిందని ఆయన ఆందోళన వ్యక్తం చేశారు. కేవలం రాజకీయ ఉనికి కోసమే ఇరు పార్టీలు భాషా హద్దులు దాటుతున్నాయని ఆయన ధ్వజమెత్తారు. ఈ మేరకు ఆయన ఎక్స్(ట్విట్టర్)లో పోస్టు చేశారు.
తెలంగాణలో ప్రస్తుతం కేవలం మాటల గారడీ తప్ప మరేమీ లేదని బండి సంజయ్ (Bandi Sanjay) విమర్శించారు. అభివృద్ధిపై చర్చలు జరగడం లేదని, పాలనలో జవాబుదారీతనం కరువైందని ఆయన ఎద్దేవా చేశారు. ముఖ్యమంత్రి రేవంత్ రెడ్డి (Revanth Reddy), మాజీ ముఖ్యమంత్రి కేసీఆర్ (KCR) ఇద్దరూ ప్రజా సమస్యలను గాలికొదిలేసి, రాజ్యాంగబద్ధమైన వేదికలను సైతం వ్యక్తిగత దూషణలకు వాడుకుంటున్నారని ఆయన ఆగ్రహం వ్యక్తం చేశారు. ప్రజలు పాలన కోసం ఓటు వేస్తే, ఈ పార్టీలు మాత్రం వీధి రాజకీయాలను తలపిస్తున్నాయని విమర్శించారు.
రాష్ట్రానికి ఇప్పుడు కావలసింది ఉద్యోగాలు, పెట్టుబడులు, రైతులకు భరోసా, మెరుగైన మౌలిక సదుపాయాలని, కానీ నేటి రాజకీయాల్లో ఇవి ఎక్కడా కనిపించడం లేదని బండి సంజయ్ అన్నారు. 2014 నుంచి తెలంగాణలో కేవలం మురికి రాజకీయాలే సాగుతున్నాయని, ఒకరిని ఒకరు తిట్టుకోవడంలోనే నాయకులు పోటీ పడుతున్నారని ఆయన ఆరోపించారు. రాష్ట్ర ప్రయోజనాల కంటే రాజకీయ ప్రయోజనాలే ముఖ్యంగా ఇరు పార్టీలు వ్యవహరిస్తున్నాయని దుయ్యబట్టారు.
నాయకులు వాడుతున్న భాష సభ్య సమాజం తలదించుకునేలా ఉందని, కనీస సంస్కారం లేకుండా ప్రవర్తించడం సరికాదని ఆయన హితవు పలికారు. అభివృద్ధిని చూపించలేని నాయకులే ఇలాంటి నీచమైన విమర్శలకు దిగుతారని బండి సంజయ్ పేర్కొన్నారు. ప్రజాస్వామ్యాన్ని అపహాస్యం చేస్తున్న ఈ పార్టీలకు తెలంగాణ ప్రజలు త్వరలోనే తగిన బుద్ధి చెబుతారని ఆయన హెచ్చరించారు.
Read Also: సీఎం రేవంత్, కేటీఆర్ తిట్ల పురాణం
Follow Us On : WhatsApp
