కలం, వెబ్ డెస్క్ : దేశ రాజధాని ఢిల్లీలో శనివారం హై అలర్ట్ ప్రకటించారు. విద్యా వ్యవస్థలో లోపాలు, పేపర్ లీకేజీ వ్యవహారాలు, విద్యాశాఖ మంత్రి ధర్మేంద్ర ప్రధాన్ రాజీనామా చేయాలనే డిమాండ్లతో కాక్రోచ్ జనతా పార్టీ (Cockroach Janta Party)తో పాటు పలు విద్యార్థి సంఘాలు జంతర్ మంతర్ వద్ద భారీ నిరసనకు పిలుపునిచ్చాయి. ఈ నేపథ్యంలో ఢిల్లీ పోలీసులు నగరవ్యాప్తంగా భద్రతను కట్టుదిట్టం చేశారు. ఇందిరాగాంధీ అంతర్జాతీయ విమానాశ్రయం, సరిహద్దు ప్రవేశ మార్గాలు, ఇతర సున్నిత ప్రాంతాలలో అదనపు బలగాలను మోహరించినట్లు అధికారులు వెల్లడించారు.
ప్రస్తుతం జంతర్ మంతర్ (Jantar Mantar) పరిసర ప్రాంతాలలో కనిపిస్తున్న దృశ్యాలు గతంలో జరిగిన రైతు ఉద్యమ రోజులను గుర్తుకు తెస్తున్నాయి. నిరసనలను అడ్డుకోవడానికి పోలీసులు ఆ ప్రాంతమంతా దాదాపు ఎనిమిది అడుగుల ఎత్తైన భారీ బారికేడ్లను ఏర్పాటు చేశారు. శాంతియుతంగా ప్రదర్శన చేయాలనుకుంటున్న విద్యార్థులు, యువత కోసం ఇంత పెద్ద ఎత్తున భద్రతా వలయాలను ఏర్పాటు చేయడంపై సోషల్ మీడియాలో తీవ్ర విమర్శలు వ్యక్తమవుతున్నాయి.
మరోవైపు శాంతిభద్రతలను పరిరక్షించడానికి, ఎలాంటి అవాంఛనీయ సంఘటనలు జరగకుండా చూసేందుకే ఈ ముందస్తు జాగ్రత్తలు తీసుకున్నట్లు భద్రతా సంస్థలు స్పష్టం చేశాయి. కాక్రోచ్ జనతా పార్టీ (Cockroach Janta Party), ఇతర విద్యార్థి సంఘాలు తమ మద్దతుదారులను శాంతియుతంగా, రాజ్యాంగబద్ధంగా నిరసన తెలపాలని కోరాయి. జూన్ 6వ తేదీన జంతర్ మంతర్ వద్ద ఎలాంటి పరిస్థితులు ఎదురవుతాయో అనే అంశంపై ఇప్పుడు అందరి దృష్టి నిలిచింది.
Read Also: మోదీ పాలనలో అన్ని రంగాలు నాశనం: మల్లికార్జున ఖర్గే
Follow Us On: X(Twitter)
