బాలీవుడ్ దిగ్గజ నటుడు, షోలే మూవీ హీరో ధర్మేంద్ర(Dharmendra) సోమవారం తుదిశ్వాస విడిచారు. కొంతకాలంగా శ్వాసకోశ సంబంధిత సమస్యలతో ఆయన ఇబ్బంది పడుతున్నారు. ఇటీవల ముంబైలోని బ్రీచ్ క్యాండీ ఆసుపత్రిలో ఆయన చికిత్స పొందారు. ఆసుపత్రిలో ఉన్న సమయంలో ఆయన ఆరోగ్యం మరింత క్షీణించడంతో ఆయనకు ఇంటిలోనే వైద్యం అందించాలని కుటుంబీకులు కోరారు. వారి అభ్యర్థన మేరకు ధర్మేంద్రకు వైద్యులు.. ఇంటిలోనే వైద్యం అందించారు. కాగా ఆయన ఆరోగ్యం మెరగవకపోగా మరింత క్షీణించడంతో సోమవారం ఆయన ముంబైలోని తన నివాసంలో తుదిశ్వాస విడిచారు. ఆయన మరణ వార్తను బాలీవుడ్ కీలక నిర్మాత కరణ్ జోహర్ వెల్లడించారు. ఆయన మరణంపై బాలీవుడ్ తీవ్ర సంతాపం తెలుపుతోంది. ప్రముఖ నటీనటులు ఆయన మరణం ఇండస్ట్రీకి తీరని లోటని తమ సంతాపం తెలుపుతున్నారు.
1935 డిసెంబర్‌ 8న పంజాబ్‌లో జన్మించిన ధర్మేంద్ర(Dharmendra) అసలు పేరు ధరమ్ సింగ్ డియోల్. హిందీ చిత్రసీమలో ‘యాక్షన్ కింగ్’, ‘హీ-మ్యాన్’గా ప్రత్యేక గుర్తింపును సంపాదించుకున్నారు. ధర్మేంద్ర కెరీర్‌లో ‘షోలే’ సినిమా ఓ పెద్ద మలుపు అయ్యింది. ఐదు దశాబ్దాలకు పైగా సాగిన ఆయన సినీజీవితంలో 300కు పైగా చిత్రాల్లో నటించి, విభిన్న పాత్రలతో తన మార్క్ చూపారు. సినీ పరిశ్రమకు అందించిన సేవలకు గుర్తింపుగా ఫిల్మ్‌ఫేర్ అవార్డు సహా జీవిత సాఫల్య పురస్కారాన్ని కూడా ధర్మేంద్ర అందుకున్నారు.
Read Also: ఆసుపత్రిలో అడ్మిట్ అయిన పలాష్ ముచ్ఛల్..
Follow Us on: Youtube
