కలం, వెబ్డెస్క్: బాలీవుడ్ స్టార్ హీరో సల్మాన్ ఖాన్ (Salman Khan) కేవలం రీల్ హీరోనే కాకుండా.. రియల్ లైఫ్లోనూ ఎంతో మంది నిరుపేదలకు, అనాథ పిల్లల చదువులకు, గుండె ఆపరేషన్ల వంటి వైద్య సహాయాలకు ‘బీయింగ్ హ్యూమన్ ఫౌండేషన్’ (Being Human Foundation) ద్వారా నిరంతరం సహాయం చేస్తుంటారు. ఈ క్రమంలోనే వెనుకబడిన ప్రాంతానికి చెందిన పాఠశాల విద్యార్థుల చదువు కోసం ఏకంగా రూ.15 కోట్ల భారీ విరాళాన్ని అందించి తన ఉదారతను చాటుకున్నారు.
అయితే సల్మాన్ ఖాన్ అందించిన ఈ నిధులతో సదరు పాఠశాలలో అత్యాధునిక మౌలిక వసతులు, డిజిటల్ క్లాస్రూమ్లను ఏర్పాటు చేయనున్నారు. ఈ భారీ సహాయానికి ధన్యవాదాలు తెలిపేందుకు ఆ స్కూల్ పిల్లలు నేరుగా సల్మాన్ ఖాన్ను కలిశారు. ఈ సందర్భంగా పిల్లలు తమ చేతులతో స్వయంగా తయారు చేసిన ఒక అందమైన బహుమతిని సల్మాన్ ఖాన్కు గిఫ్ట్ గా ఇచ్చారు.
ఆ చిన్నారుల నిష్కల్మషమైన ప్రేమకు, వారు ఇచ్చిన గిఫ్ట్కు సల్మాన్ ఖాన్ తీవ్ర భావోద్వేగానికి (Emotional) లోనయ్యారు. పిల్లల ముద్దుల కానుకను చూసి ఆయన కన్నీళ్లు పెట్టుకున్నారు. ఆ చిన్నారులను మనస్పూర్తిగా హత్తుకున్నారు. ఈ దృశ్యాలు, వీడియోలు ప్రస్తుతం సోషల్ మీడియా ప్లాట్ఫారమ్లలో విపరీతంగా వైరల్ అవుతున్నాయి.
