కలం, మహబూబ్ నగర్ బ్యూరో : పాలమూరు జిల్లాను (Mahabubnagar) మహిళలు శాసిస్తున్నారు. మూడు ప్రధాన పోస్టుల్లో మహిళలు తమదైన శైలిలో రాణిస్తూ ప్రజల ఆదరాభిమానాలను చురగొంటున్నారు. మహబూబ్నగర్ జిల్లా పరిపాలన, శాంతిభద్రతలు , నగర పాలక వ్యవస్థ అనే మూడు కీలక విభాగాలకు మహిళలే నేతృత్వం వహిస్తుండటం ఒక అరుదైన స్ఫూర్తిదాయకమైన విషయం. జిల్లా కలెక్టర్గా ఖుష్బూ గుప్తా (ఐఏఎస్), జిల్లా ఎస్పీగా డి. జానకి (ఐపీఎస్), నగర మేయర్గా గుమ్మాల మమత వ్యవహరిస్తూ పాలమూరు గడ్డపై మహిళా శక్తిని చాటుతున్నారు.
కలెక్టర్ ఖుష్బూ గుప్తా మహబూబ్నగర్ జిల్లా పాలనా పగ్గాలను 2026 ఫిబ్రవరి చివరి వారంలో చేపట్టారు. 2019 బ్యాచ్కు చెందిన ఐఏఎస్ అధికారిణి అయిన ఖుష్బూ గుప్తా, పంజాబ్ రాష్ట్రానికి చెందినవారు. ఆమె ఐఐటీ ఢిల్లీ నుండి కంప్యూటర్ సైన్స్లో ఎం.టెక్ పూర్తి చేశారు. మొదట బీహార్ క్యాడర్కు ఎంపికైన ఆమె, వివాహానంతరం తెలంగాణ క్యాడర్కు బదిలీ అయ్యారు. మహబూబ్నగర్ కలెక్టర్గా బాధ్యతలు చేపట్టడానికి ముందు ఆమె అదనపు కలెక్టర్గా, ఐటీడీఏ ప్రాజెక్ట్ ఆఫీసర్గా సేవలందించారు. బాధ్యతలు స్వీకరించిన వెంటనే ప్రజా సమస్యల పరిష్కారం (ప్రజావాణి)పై ప్రత్యేక దృష్టి సారించారు. క్షేత్రస్థాయిలో పర్యటిస్తూ, అభివృద్ధి పనులను , సంక్షేమ పథకాల అమలును వేగవంతం చేస్తున్నారు.
శాంతిభద్రతల పరిరక్షణ బాధ్యతను సూపరింటెండెంట్ ఆఫ్ పోలీస్ (ఎస్పీ) హోదాలో డి. జానకి సమర్థవంతంగా నిర్వహిస్తున్నారు. ఆమె బాధ్యతలు చేపట్టినప్పటి నుండి రోడ్డు భద్రత, మహిళల రక్షణపై ప్రత్యేక శ్రద్ధ కనబరుస్తున్నారు. తరచూ ప్రమాదాలు జరిగే ప్రాంతాలను (బ్లాక్ స్పాట్) స్వయంగా పరిశీలించి, ప్రమాద నివారణకు చర్యలు తీసుకుంటున్నారు. షీ టీమ్స్ ద్వారా మహిళలకు భరోసా కల్పిస్తూ, సైబర్ నేరాలపై ప్రజల్లో అవగాహన కల్పిస్తున్నారు. అలాగే, పెండింగ్ కేసుల పరిష్కారానికి లోక్ అదాలత్ల ద్వారా చొరవ చూపుతున్నారు.
మహబూబ్నగర్ నగర పాలక సంస్థ (మున్సిపల్ కార్పొరేషన్) ప్రథమ పౌరురాలిగా గుమ్మాల మమత ఇటీవల ఎన్నికయ్యారు. ఈ ఏడాది ఫిబ్రవరిలో జరిగిన మున్సిపల్ ఎన్నికల్లో కాంగ్రెస్ పార్టీ తరపున 3వ డివిజన్ నుండి కార్పొరేటర్గా గెలుపొందిన ఆమె, మేయర్ పీఠాన్ని దక్కించుకున్నారు. సామాన్య కార్యకర్త స్థాయి నుండి మేయర్ స్థాయికి ఎదిగిన ఆమె ప్రస్థానం ఎంతోమందికి ఆదర్శం. నగరంలో మౌలిక వసతుల కల్పన , పారిశుద్ధ్యంపై ఆమె దృష్టి సారించారు. మహిళా సాధికారతకు నిదర్శనం. సాధారణంగా ఒక జిల్లాలో కలెక్టర్, ఎస్పీ, లేదా మేయర్ పదవుల్లో ఎవరో ఒకరు మహిళ ఉండటం చూస్తుంటాం. కానీ, పాలమూరులో ఈ మూడు అత్యున్నత పదవుల్లోనూ ఏకకాలంలో మహిళలే ఉండటం జిల్లా చరిత్రలో ఒక విశేష ఘట్టం. వీరు ముగ్గురూ సమన్వయంతో పనిచేస్తూ, జిల్లా అభివృద్ధికి , ప్రజా సమస్యల పరిష్కారానికి కృషి చేస్తుండటం మహిళా సాధికారతకు గొప్ప నిదర్శనంగా నిలుస్తోంది.
