కలం, స్పోర్ట్స్ : బుమ్రా గాయం ఇప్పుడు భారత క్రికెట్లో మరో చర్చకు తెరతీసింది. బెంగళూరులోని బీసీసీఐ సెంటర్ ఆఫ్ ఎక్సలెన్స్ పనితీరుపై ప్రశ్నలు వస్తున్న వేళ మాజీ క్రికెటర్ రవిచంద్రన్ అశ్విన్ (Ravichandran Ashwin) స్పందించాడు. ఆటగాళ్ల గాయాల నిర్వహణలో జవాబుదారీతనం ఉండాల్సిన అవసరం ఉందని చెప్పాడు. శ్రీలంకతో టెస్టు సిరీస్కు జస్ప్రీత్ బుమ్రా (Jasprit Bumrah ) అందుబాటులో ఉంటాడని సెలెక్టర్లు తొలుత భావించినట్లు నివేదికలు పేర్కొన్నాయి. అయితే తర్వాత అతడి గాయం తీవ్రత ఎక్కువగా ఉన్నట్లు తెలిసింది.
సీఓఈ స్పోర్ట్స్ సైన్స్, మెడికల్ టీమ్కి, సెలెక్షన్ కమిటీకి మధ్య సమాచార లోపం ఉందనే చర్చ మొదలైంది. ఈ నేపథ్యంలో టెస్టులు, వన్డేలు, టీ20లకు ప్రత్యేక జట్లు ఉండాల్సిన సమయం వచ్చిందని అశ్విన్ సూచించాడు. అవసరమైతే ఒకరిద్దరు ఆటగాళ్లు మాత్రమే ఫార్మాట్ల మధ్య కొనసాగవచ్చని పేర్కొన్నాడు. వరుణ్ చక్రవర్తి రీహ్యాబ్ వ్యవహారాన్ని కూడా అశ్విన్ ప్రస్తావించాడు. వరుణ్ మూడు నుంచి నాలుగు నెలలు నేషనల్ క్రికెట్ అకాడమీలో ఉన్నాడని చెప్పాడు.
తమిళనాడు ప్రీమియర్ లీగ్లో ఆడేందుకు అనుమతి కోరినా విడుదల చేయలేదని పేర్కొన్నాడు. అదే సమయంలో గాయాల విషయంలో ఆటగాళ్ల బాధ్యత కూడా ఉంటుందని అశ్విన్ తెలిపాడు. తనకు 2015లో ఒలింపిక్ లిఫ్టింగ్ కారణంగా సైడ్ స్ట్రెయిన్ వచ్చిందని గుర్తు చేసుకున్నాడు. ఆ తర్వాత ఆ వ్యాయామాన్ని ఆపేశానని చెప్పాడు. గాయాల నిర్వహణపై ప్రస్తుతం చర్చ కొనసాగుతోంది. సీఓఈ, సెలెక్షన్ కమిటీ, ఆటగాళ్ల మధ్య సమన్వయం ఎలా ఉండాలన్న అంశం మరోసారి ముందుకు వచ్చింది.
