కలం, వెబ్ డెస్క్ : ఉదయం నిద్రలేవగానే ఫ్రెష్గా ఉండాలి.. కానీ తల భారంగా, నొప్పితో రోజును ప్రారంభిస్తున్నారా? చాలా మంది దీన్ని చిన్న సమస్యగా తీసుకుని నిర్లక్ష్యం చేస్తున్నారు. కానీ నిపుణులు చెబుతున్న ప్రకారం, ఇది శరీరం ఇస్తున్న ఒక ముఖ్యమైన హెచ్చరిక.
గత కొన్ని అధ్యయనాల ప్రకారం, ఉదయం తలనొప్పికి ప్రధాన కారణం డీహైడ్రేషన్ (శరీరంలో నీటి కొరత). రోజంతా సరిపడా నీరు తాగకపోతే, రాత్రి సమయంలో శరీరం మరింత నీరసించి ఉదయానికే తలనొప్పిగా (Morning Headache) మారుతుంది. అలాగే నిద్రలో ఆక్సిజన్ సరఫరా తగ్గినా మెదడులో రక్తప్రసరణలో మార్పులు చోటుచేసుకుని నొప్పి వస్తుంది. ప్రత్యేకంగా స్లీప్ అప్నియా (Sleep apnea) (నిద్రలో శ్వాస ఆగిపోవడం), సైనస్ ఇన్ఫెక్షన్లు, నిద్రలో పళ్లు కొరకడం వంటి సమస్యలు ఉన్నవారిలో ఈ తలనొప్పి ఎక్కువగా కనిపిస్తుంది.
నిపుణులు ఏమంటున్నారంటే
న్యూరాలజీ నిపుణుడు డాక్టర్ సుజిత్ కుమార్ (Sujith Kumar) వివరణ ప్రకారం, ఇది ఒక “సైలెంట్ వార్నింగ్”. నిద్రకు ముందు ఎక్కువసేపు మొబైల్ ఉపయోగించడం, ఆల్కహాల్ తీసుకోవడం, సరైన సమయానికి భోజనం చేయకపోవడం వంటి అలవాట్లు మెదడులోని న్యూరోట్రాన్స్మిటర్లపై ప్రభావం చూపుతాయి. దీని వల్ల నొప్పిని తట్టుకునే శక్తి తగ్గి, ఉదయం లేవగానే అసౌకర్యం పెరుగుతుంది. ఈ సమస్యను నిర్లక్ష్యం చేయడం వల్ల కాలక్రమేణా జ్ఞాపకశక్తి మందగించడం, మానసిక ఒత్తిడి పెరగడం, గుండె ఆరోగ్యం దెబ్బతినే ప్రమాదం ఉంది. తరచుగా వచ్చే ఈ తలనొప్పిని కేవలం ఒక రోజు సమస్యగా చూడకుండా, శరీరానికి కావాల్సిన రీసెట్ ప్రక్రియలో ఏదో లోపం ఉందని గుర్తించాలని పరిశోధనలు సూచిస్తున్నాయి.
ఉదయం ప్రశాంతంగా నిద్రలేవాలంటే కొన్ని జాగ్రత్తలు తప్పనిసరి. పగటిపూట తగినంత నీరు తాగడం, నిద్రకు ముందు ప్రశాంతమైన వాతావరణాన్ని కల్పించుకోవడం, నిర్ణీత సమయానికి పడుకోవడం వంటివి ఎంతో మేలు చేస్తాయి. అలాగే నిద్రపోయే గది చీకటిగా, నిశ్శబ్దంగా ఉండేలా చూసుకోవడం వల్ల నాణ్యమైన నిద్ర లభిస్తుంది.
