కలం, వెబ్ డెస్క్ : నేపాల్ (Nepal) నూతన ప్రధానిగా బాలెన్ షా ప్రమాణ స్వీకారం చేసిన మరుసటి రోజే ఆదేశ ప్రభుత్వం సంచలన నిర్ణయం తీసుకుంది. కొత్త ప్రభుత్వం ఏర్పడిన కొద్ది గంటల్లోనే మాజీ ప్రధాని కేపీ. శర్మ ఓలీ (KP Sharma Oli) ని అరెస్ట్ చేసింది. ఆయనతో పాటు మాజీ హోం మంత్రి రమేశ్ లేఖక్ లను కూడా పోలీసులు అదుపులోకి తీసుకున్నారు. ఎన్నికలకు ముందు జరిగిన జెన్ జీ నిరసనలను కేపీ. శర్మ ఓలీ అణచివేశారన్న కారణాలతో నూతన ప్రభుత్వం ఈ నిర్ణయం తీసుకుంది.
అయితే, నేపాల్ ప్రధాన మంత్రిగా బాలెన్ షా (Nepal PM Balendra Shah) ప్రమాణ స్వీకారం చేసిన మరుసటి రోజే ఈ పరిణామం చోటు చేసుకోవడం ఆ దేశంతో పాటు ప్రపంచవ్యాప్తంగా చర్చనీయాంశంగా మారింది. నూతన పీఎం అధ్యక్షతన జరిగిన తొలి క్యాబినెట్ సమావేశంలోనే జెన్ జీ నిరసనలపై ఏర్పాటు చేసిన కమిషన్ నివేదికను పరిశీలించారు. అనంతరం కమిషన్ ఇచ్చిన నివేదిక ఆధారంగా మాజీ ప్రధాని కేపీ. శర్మ అరెస్టుకు ప్రభుత్వం నిర్ణయించింది. శనివారం తెల్లవారు జామున ముందుగా మాజీ హోం మంత్రి రమేశ్ లేఖన్ ను పోలీసులు అరెస్ట్ చేశారు. అనంతరం కొద్ది సమయానికే మాజీ ప్రధాని కేపీ శర్మ ఓలిని కూడా అదుపులోకి తీసుకున్నారు.
Read Also: పురుషాధిక్య రాజకీయాల్లో.. నారీ భేరీ
Follow Us On : WhatsApp
