కలం, స్పోర్ట్స్ : లాస్ ఏంజెల్స్ 2028 ఒలింపిక్స్ (LA 2028 Olympics) కు సంబంధించిన మహిళల బాస్కెట్బాల్ (FIBA Women Basketball) ప్రీ-క్వాలిఫయింగ్ టోర్నీకి మెక్సికో ఆతిథ్యం ఇవ్వనుంది. ఈ టోర్నీ ఆగస్టు 17 నుంచి 23 వరకు గ్వాడలహారాలో జరగనున్నట్లు ఫిబా ప్రకటించింది. 2026 మహిళల బాస్కెట్బాల్ వరల్డ్ కప్కు అర్హత సాధించలేకపోయిన ఎనిమిది జట్లు ఈ పోటీలో పాల్గొంటాయి. అర్జెంటీనా, బ్రెజిల్, కెనడా, న్యూజిలాండ్, ఫిలిప్పీన్స్, సెనెగల్, దక్షిణ సూడాన్, మెక్సికో జట్లు ఇందులో బరిలోకి దిగనున్నాయి.
వాస్తవానికి కొలంబియా ఈ టోర్నీలో ఆడాల్సి ఉంది. అయితే పాల్గొనలేకపోవడంతో, అదే ఖండానికి చెందిన అర్హత సాధించని జట్లలో అత్యుత్తమ ర్యాంక్ ఉన్న మెక్సికోకు అవకాశం లభించింది. ఈ టోర్నీలో విజేతగా నిలిచే జట్టుకు మాత్రమే 2028 ఫిబ్రవరిలో జరిగే ఫిబా మహిళల ఒలింపిక్ క్వాలిఫయింగ్ టోర్నమెంట్లలో ఆడే అవకాశం దక్కుతుంది. శుక్రవారం ఫిబా ప్రధాన కార్యాలయంలో డ్రా నిర్వహించనున్నారు. ఎనిమిది జట్లను నాలుగు జట్ల చొప్పున రెండు గ్రూపులుగా విభజిస్తారు.
ప్రతి జట్టు తమ గ్రూపులోని మిగతా జట్లతో ఒక్కో మ్యాచ్ ఆడుతుంది. గ్రూప్ దశ ముగిసిన తర్వాత తొలి రెండు స్థానాల్లో నిలిచిన జట్లు సెమీఫైనల్స్కు చేరుకుంటాయి. అక్కడి నుంచి ఫైనల్ గెలిచిన జట్టు తదుపరి ఒలింపిక్ క్వాలిఫయింగ్ టోర్నీకి అర్హత సాధిస్తుంది. అయితే గ్వాడలహారాలో అర్హత సాధించలేని జట్లకు అవకాశాలు పూర్తిగా ముగిసిపోవు. 2027లో జరిగే ఖండ స్థాయి మహిళల కప్ పోటీల ద్వారా కూడా అవి LA 2028 దిశగా తమ ప్రయాణాన్ని కొనసాగించవచ్చు.
Read Also: మనమే ఫేమస్ కపుల్.. మోదీతో ఇటలీ ప్రధాని మెలోని సంభాషణ
Follow Us On: X(Twitter)
