కలం, మహబూబాబాద్ : మహబూబాబాద్ జిల్లాలోని ఓ బ్యాంకులో బంగారు రుణాల వ్యవహారంలో అక్రమాలకు పాల్పడినట్లు ఆరోపణలు రావడంతో అసిస్టెంట్ మేనేజర్పై పోలీసులు కేసు నమోదు చేశారు. ఇండియన్ బ్యాంకు మహబూబాబాద్ బ్రాంచ్ (Mahabubabad Indian Bank)లో అసిస్టెంట్ మేనేజర్గా పనిచేస్తున్న భూక్య రాజేష్ బంగారు రుణాల పేరుతో అక్రమాలకు పాల్పడి, బంగారాన్ని దుర్వినియోగం చేసినట్లు బ్యాంకు మేనేజర్ పోలీసులకు ఫిర్యాదు చేశారు.
పోలీసుల వివరాల ప్రకారం.. బ్యాంకులో గోల్డ్ లోన్ విభాగానికి సంబంధించిన వ్యవహారాల్లో అసిస్టెంట్ మేనేజర్ భూక్య రాజేష్ అక్రమాలకు పాల్పడ్డాడన్న ఆరోపణలు ఉన్నాయి. రూ.90 లక్షల విలువైన సుమారు 700 గ్రాముల బంగారం ఉంటుందని తెలిపారు. బ్యాంకులోని బంగారు రుణాలకు సంబంధించిన రికార్డులు, తాకట్టు పెట్టిన బంగారం వివరాలను పరిశీలించిన సమయంలో ఈ వ్యవహారం వెలుగులోకి వచ్చినట్లు సమాచారం.
మేనేజర్ ఫిర్యాదుతో కేసు
బ్యాంకులో జరిగిన అక్రమాలపై బ్యాంకు మేనేజర్ పోలీసులకు ఫిర్యాదు చేయడంతో కేసు నమోదు చేశారు. ఫిర్యాదు ఆధారంగా పోలీసులు దర్యాప్తు ప్రారంభించారు. గోల్డ్ లోన్ ఖాతాలు, రుణాల మంజూరు ప్రక్రియ, బంగారం తాకట్టు వివరాలు, బ్యాంకు రికార్డులను పోలీసులు పరిశీలిస్తున్నట్లు సమాచారం.
అసిస్టెంట్ మేనేజర్ రాజేష్ ఏ విధంగా బంగారాన్ని దుర్వినియోగం చేశాడు? ఈ వ్యవహారంలో మరెవరైనా సహకరించారా? బ్యాంకు నిబంధనలను ఎలా ఉల్లంఘించారు? అనే అంశాలపై పోలీసులు దృష్టి సారించారు.
పూర్తి దర్యాప్తుతోనే స్పష్టత
బంగారం మాయమైన ఘటనలో 700 గ్రాముల బంగారం దర్యాప్తులో కీలకంగా మారాయి. బంగారం ప్రస్తుతం ఎక్కడ ఉంది? దాన్ని ఎవరికి అప్పగించారు? గోల్డ్ లోన్ పేరుతో ఏ మేరకు అక్రమ లావాదేవీలు జరిగాయి? అనే కోణాల్లో పోలీసులు ఆధారాలు సేకరిస్తున్నారు.
