కలం డెస్క్ : ఫార్ములా ఈ-కార్ రేసులో ప్రథమ నిందితుడిగా ఉన్న బీఆర్ఎస్ వర్కింగ్ ప్రెసిడెంట్ కేటీఆర్(KTR) ముఖ్యమంత్రి రేవంత్‌రెడ్డి(Revanth Reddy)పై సంచలన ఆరోపణలు చేశారు. ఈ కేసులో పస లేదని, ఎంత లోతుగా దర్యాప్తు జరిగినా తేలేది ఏమీ ఉండదన్నారు. ఈ కేసులో అక్రమాలు జరిగాయని, నిబంధనల ఉల్లంఘన జరిగిందని అధికారులు చెప్తున్నా వాస్తవాలేంటో ముఖ్యమంత్రికి తెలుసని, తనను అరెస్టు చేసేంత ధైర్యం ఆయనకు లేదని అన్నారు. మీడియా ప్రతినిధులతో చిట్‌చాట్ సందర్భంగా కేటీఆర్ మాట్లాడుతూ, ప్రాసిక్యూట్ చేయడానికి ఏసీబీ అధికారులకు గవర్నర్ అనుమతి ఇచ్చినా చివరకు తనను దోషిగా చూపెట్టేందుకు ఏమీ దొరకదన్నారు. ఇప్పటికే నాలుగుసార్లు ఏసీబీ విచారణకు, ఒకసారి ఈడీ విచారణకు హాజరైన కేటీఆర్‌పై ఇప్పుడు ప్రాసిక్యూట్ చేయడానికి గవర్నర్ నుంచి రాష్ట్ర ప్రభుత్వం అనుమతి తీసుకోవడం రాజకీయ కక్షసాధింపు చర్యల్లో భాగమేనని మాజీ మంత్రి హరీశ్‌రావు(Harish Rao) ఇప్పటికే వ్యాఖ్యానించారు.
అనర్హత వేటు పడొద్దనే రాజీనామా :
ఖైరతాబాద్ ఎమ్మెల్యే దానం నాగేందర్(Danam Nagender) పార్టీ ఫిరాయింపు చర్యలకు పాల్పడ్డారనేది సుస్పష్టమని కామెంట్ చేసిన కేటీఆర్(KTR).. ఆయనపై స్పీకర్ అనర్హత వేటు వేస్తే పరువు పోతుందని, ఆరు సంవత్సరాల దాకా పోటీచేసే అవకాశాన్ని కోల్పోతారని, అందుకే స్వచ్ఛందంగా రాజీనామా చేయబోతున్నారని అన్నారు. కాంగ్రెస్ బీ-ఫామ్ తీసుకుని ఆ పార్టీ ఎన్నికల గుర్తుపై పార్లమెంటు ఎన్నికల్లో పోటీ చేసిన దానం నాగేందర్ అడ్డంగా దొరికిపోయారని, ఆయనపై అనర్హత వేటు వేయడం ఖాయమని, అందుకే పరువు దక్కించుకోడానికి రాజీనామా చేస్తున్నారని అన్నారు. దానం నాగేందర్‌తో రాజీనామా చేయించి స్టేషన్ ఘన్‌పూర్ ఎమ్మెల్యే కడియం శ్రీహరిని కాపాడే ప్రయత్నం జరుగుతున్నదని ఆరోపించారు. ఇందుకు టెక్నికల్ గ్రౌండ్ చూపించి కాపాడే ప్రయత్నాలు మొదలయ్యాయన్నారు. దానం నాగేంధర్ రాజీనామాతో ఖైరతాబాద్ అసెంబ్లీ స్థానానికి ఉప ఎన్నిక ఖాయమని, దానికంటే ముందే గ్రేటర్ హైదరాబాద్ మున్సిపల్ కార్పొరేషన్ ఎన్నికలొస్తాయన్నారు.
Read Also: రాష్ట్రంలో రెండు ‘పవర్ సెంటర్లు’ కుదరదు : స్టాలిన్
Follow Us on: Youtube
