కలం, వెబ్ డెస్క్: తెలంగాణలోని కాజీపేట్ రైల్వే మ్యానుఫ్యాక్చరింగ్ యూనిట్ (Kazipet Railway Unit) అభివృద్ధిపై కేంద్ర రైల్వే శాఖ మంత్రి అశ్విని వైష్ణవ్ (Ashwini Vaishnaw)గురువారం కీలక సమీక్ష నిర్వహించారు. రాబోయే ఐదేళ్లలో ఈ యూనిట్ ద్వారా 200 అత్యాధునిక ఇంటర్ సిటీ రైళ్లను తయారు చేయాలని ఆయన లక్ష్యంగా నిర్దేశించారు. ఈ నిర్ణయం పట్ల కేంద్ర మంత్రి కిషన్ రెడ్డి (Kishan Reddy) హర్షం వ్యక్తం చేస్తూ తెలంగాణపై నిరంతర మద్దతు చూపుతున్న ప్రధానమంత్రి నరేంద్ర మోదీకి, రైల్వే మంత్రి అశ్విని వైష్ణవ్కు కృతజ్ఞతలు తెలిపారు. ఈ ప్రాజెక్టు ద్వారా దేశవ్యాప్తంగా తక్కువ ఖర్చుతో కూడిన, ఇంధన సామర్థ్యం కలిగిన రవాణా సౌకర్యాలు అందుబాటులోకి రానున్నాయని రైల్వే మంత్రిత్వ శాఖ పేర్కొంది.
ఈ కొత్త ఇంటర్సిటీ రైళ్లు గంటకు 130 కిలో మీటర్ల వేగంతో ప్రయాణించనున్నాయి. ఇవి సుమారు 300 కిలోమీటర్ల పరిధిలోని నగరాలను అనుసంధానం చేస్తాయి. ఆటోమేటిక్ డోర్ క్లోజింగ్, మెరుగైన వెంటిలేషన్, 20 కోచ్ల కాన్ఫిగరేషన్తో కూడిన సురక్షితమైన డిజైన్తో ఈ రైళ్లు రూపుదిద్దుకోనున్నాయి. ఈ రైళ్ల వల్ల ముఖ్యంగా సమీపంలోని పట్టణాలకు వెళ్లే విద్యార్థులకు, వైద్య సేవలు, ఉద్యోగ రీత్యా రాకపోకలు సాగించే సామాన్య ప్రజలకు ఎంతో మేలు జరుగుతుందని కిషన్ రెడ్డి వివరించారు. ఈ రైళ్లు ఎక్కువ స్టాపులు కలిగి ఉండటం వల్ల చిన్న పట్టణాల ప్రజల రవాణా అవసరాలు సులభంగా తీరుతాయని ఆయన ఎక్స్ వేదికగా వెల్లడించారు.
