కలం, కరీంనగర్ బ్యూరో : ఉమ్మడి కరీంనగర్ (Karimnagar) జిల్లాలో బీఆర్ఎస్ పార్టీ పునర్వ్యవస్థీకరణకు రంగం సిద్ధమైంది. పార్టీని క్షేత్రస్థాయి నుంచి బలోపేతం చేసేందుకు అధినేత, మాజీ ముఖ్యమంత్రి కే. చంద్రశేఖర్ రావు పచ్చజెండా ఊపారు. పార్టీని క్షేత్రస్థాయి నుంచి ప్రక్షాళన చేసేందుకు నాయకత్వం ఈ నిర్ణయం తీసుకుంది. పాత మండల, జిల్లా కమిటీలను రద్దు చేసి, నూతన ఉత్సాహంతో కూడిన కొత్త బృందాలను రంగంలోకి దించాలని పార్టీ నాయకత్వం నిర్ణయించింది. దీంతో ఉమ్మడి జిల్లా వ్యాప్తంగా సరికొత్త కమిటీల ఏర్పాటు ప్రక్రియ ఊపందుకోనుంది. భారత్ రాష్ట్ర సమితి (BRS) పార్టీలో కీలక పరిణామాలు చోటుచేసుకున్నాయి.
రాష్ట్ర కమిటీ మినహా, గ్రామం, మండలం, జిల్లా స్థాయుల్లో ఉన్న అన్ని కమిటీలను తక్షణమే రద్దు చేశారు. త్వరలోనే ఆన్లైన్, ఆఫ్లైన్ పద్ధతుల్లో కొత్త సభ్యత్వ నమోదు కార్యక్రమం ప్రారంభం కానుంది. డిజిటల్ విధానంతో పాటు రశీదు పుస్తకాల ద్వారా సభ్యత్వాలను సేకరిస్తారు. సభ్యత్వ నమోదు ప్రక్రియ పూర్తయిన తర్వాత, గ్రామ స్థాయి నుంచి కొత్త ప్రతినిధులను నియమిస్తారు. వీరికి ప్రత్యేక శిక్షణ తరగతులు కూడా నిర్వహించనున్నారు. ఉమ్మడి కరీంనగర్ (Karimnagar) జిల్లా పరిధిలోని 4 జిల్లా కమిటీలు, దాదాపు 60 మండల కమిటీల నియామకంపై ఇప్పటికే కసరత్తు ప్రారంభమైంది. గ్రామ స్థాయి నుంచి పార్టీని బలోపేతం చేసి, ప్రజలతో నేరుగా అనుసంధానం కావడమే లక్ష్యంగా ఈ భారీ మార్పులు చేపడుతున్నారు.
యువత, మహిళలకు పెద్దపీట..
ఈసారి కమిటీల ఎంపికలో యువతకు, మహిళలకు అధిక ప్రాధాన్యత ఇవ్వాలని కేసీఆర్ (KCR) స్పష్టమైన ఆదేశాలు జారీ చేశారు. ఆన్లైన్, ఆఫ్లైన్ విధానాల్లో సభ్యత్వ నమోదు ప్రక్రియను విస్తృతంగా చేపట్టనున్నారు. చురుగ్గా పనిచేసే కార్యకర్తలను గుర్తించి వారికి తగిన బాధ్యతలు అప్పగించనున్నారు. సభ్యత్వ నమోదు అనంతరం కార్యకర్తల వివరాలతో సమగ్ర డేటాబేస్ సిద్ధం చేయనున్నారు. వీరికి ప్రత్యేక శిక్షణా శిబిరాలు నిర్వహించి.. ఎన్నికల వ్యూహాలు, ప్రజా సమస్యలపై పోరాటం, మరియు సోషల్ మీడియా వినియోగంపై పూర్తి అవగాహన కల్పించనున్నారు.
పార్టీ బలోపేతమే లక్ష్యంగా..
రాష్ట్రంలో కాంగ్రెస్ ప్రభుత్వం అనుసరిస్తున్న ప్రజా వ్యతిరేక విధానాలను తిప్పికొట్టడమే లక్ష్యంగా పార్టీని బలోపేతం చేయాలని కేసీఆర్ నిర్ణయించారు. కేవలం సంఖ్యాబలం కంటే, పార్టీకి బలమైన పునాది వేయడమే లక్ష్యంగా ఈ మార్పులు చేపడుతున్నారు. ఈ ప్రక్రియకు సంబంధించిన పూర్తి షెడ్యూల్ను పార్టీ త్వరలోనే విడుదల చేయనుంది. గత కొంతకాలంగా పార్టీ పేరు విషయంలో జరుగుతున్న చర్చల నేపథ్యంలో, తిరిగి తెలంగాణ నినాదాన్ని బలంగా వినిపించే దిశగా నాయకత్వం అడుగులు వేస్తోంది. పార్టీ పేరును తిరిగి ‘టీఆర్ఎస్’గా మార్చే అంశంపై కూడా అంతర్గత చర్చలు జరుగుతున్నట్లు సమాచారం. ఈ మొత్తం ప్రక్రియకు సంబంధించిన పూర్తి షెడ్యూల్ను పార్టీ త్వరలోనే విడుదల చేయనుంది.
Read Also: కేరళం సీఎం ఎవరు? రేసులో ముగ్గురు హేమాహేమీలు
Follow Us On : WhatsApp
