బీసీ బంద్(BC Bandh)కు తెలంగాణ జాగృతి సంపూర్ణ మద్దతు తెలిపింది. ఖైరతాబాద్ చౌరస్తాలో బీసీ బంద్‌కు మద్దతుగా జాగృతి అధ్యక్షురాలు కవిత(Kavitha).. మానవహారం కార్యక్రమం నిర్వహించారు. ఈ సందర్బంగా ఆమె కాంగ్రెస్, బీజేపీలపై విమర్శలు గుప్పించారు. రిజర్వేషన్లు రాకపోవడానికి కారణమైన వారే బంద్‌కు మద్దతు ఇవ్వడం హంతకులే నివాళులు అర్పిస్తున్నట్లు ఉందని చురకలంటించారు. బీసీ బిడ్డను పదేపదే మోసం చేస్తున్నారని అన్నారు. ఒకరు దొంగ జీవోలతో మోసం చేస్తే, మరికొందరు పార్లమెంటులో బిల్లును పాస్ చేయకుండా కాలక్షేపం చేస్తున్నారని ఆమె ఆగ్రహం వ్యక్తం చేశారు. ‘‘మహారాష్ట్ర, తమిళనాడు లో 5 ఏళ్ల వరకు ఎన్నికలు జరగలేదు. బీసీలకు రిజర్వేషన్ల అంశం తేలిన తర్వాత ఎన్నికలు నిర్వహించాలి. సర్పంచ్ లకు బిల్లులు ఇవ్వకుండా కాంగ్రెస్ పార్టీ వారిని ఇబ్బంది పెడుతోంది. బీసీ రిజర్వేషన్లను అమలు చేయాల్సిన పార్టీలు చిత్తశుద్ధిగా పనిచేయాలని నేను డిమాండ్ చేస్తున్నా’’ అని తెలిపారు.
‘‘బీసీ బిడ్డలు తమకు రిజర్వేషన్లు కావాలని కోరుతున్నారు. రిజర్వేషన్లు ఇచ్చే పార్టీలే బంద్ కు మద్దతు ప్రకటించటం నవ్వులాటగా ఉంది. దొంగ జీవోలు ఇచ్చిన కాంగ్రెస్, బీసీ బిల్లును పాస్ చేయించాల్సిన బీజేపీ లు బంద్ కు మద్దతు పేరుతో డ్రామాలు చేస్తున్నాయి. హంతకులే వచ్చి నివాళులు అర్పించినట్లు వ్యవహరిస్తున్నారు. బీసీ బిడ్డలను పదే పదే మోసం చేస్తున్నారు. స్వాతంత్రం వచ్చిన నాటి నుంచి బీసీలను మోసం చేస్తున్నారు. తెలంగాణ ఉద్యమం మాదిరిగా మరో బీసీ ఉద్యమాన్ని చేపడతాం. తెలంగాణ బీసీ బిడ్డల పంతం దేశానికి ఆదర్శంగా నిలవాలి’’ అని ఆమె(Kavitha) పిలుపునిచ్చారు.
‘‘యూనైటెడ్ ఫూలే ఫ్రంట్ ఆధ్వర్యంలో జాగృతి ఈ కార్యక్రమాన్ని నిర్వహిస్తోంది. బీసీ బంద్ ను విజయవంతం చేయాలని ప్రతి ఒక్కరినీ కోరుతున్నా. బీసీల రిజర్వేషన్లు అమలు చేసేలా టెక్నికల్ గా ప్రభుత్వాలు సరైన వాదనలు వినిపించటం లేదు. ఈ కారణంగానే బీసీలకు వ్యతిరేకంగా సుప్రీంకోర్టులో తీర్పులు వస్తున్నాయి. కాంగ్రెస్ పార్టీ రూల్స్ ప్రకారం జనగణన నిర్వహించలేదు. జీవో 9 విషయంలో కూడా కాంగ్రెస్ కు చిత్తశుద్ధి లేదు. అందుకే కోర్టు జీవో ను కొట్టేసింది. బీసీల రిజర్వేషన్ల విషయంలో కాంగ్రెస్, బీజేపీలకు చిత్తశుద్ధి లేదు. ఇప్పటికిప్పుడే ఎన్నికలు జరగాల్సినంత తొందర ఏముంది?’’ అని ప్రశ్నించారు.
Read Also: మోదీకి అమెరికన్ సింగర్ సపోర్ట్.. రాహుల్‌కు స్ట్రాంగ్ రిప్లై..
