కలం, వెబ్ డెస్క్: భారత ఫుట్బాల్ అభిమానులకు ఎట్టకేలకు ఒక సూపర్ గుడ్ న్యూస్ అందింది. ఎన్నో నెలల సస్పెన్స్, చర్చల తర్వాత 2026 ఫిఫా వరల్డ్ కప్ (FIFA World Cup) అధికారిక ప్రసార హక్కులను భారత్ దక్కించుకోబోతోంది. దీనికి సంబంధించిన అధికారిక ప్రకటన వచ్చే వారం వచ్చే అవకాశం ఉంది. సుమారు 30 నుండి 35 మిలియన్ డాలర్ల విలువతో ఈ డీల్ కుదిరినట్లు తెలుస్తోంది. ప్రపంచంలోనే అత్యంత వేగంగా ఎదుగుతున్న స్పోర్ట్స్ మార్కెట్ అయిన భారత్లో ఈ మెగా టోర్నీ ప్రసారం కానుండటం అభిమానులకు పెద్ద ఉపశమనం కలిగించే విషయమే.
ఈ 2026 ప్రపంచకప్ను అమెరికా, కెనడా, మెక్సికో దేశాలు సంయుక్తంగా నిర్వహిస్తున్నాయి. చరిత్రలోనే అత్యంత పెద్దదైన ఈ టోర్నీలో ఫిఫా జట్ల సంఖ్యను 32 నుండి 48కి పెంచింది. దీనివల్ల మొత్తం మ్యాచ్ల సంఖ్య కూడా 64 నుండి 104కి పెరిగింది. వాణిజ్యపరంగా, వ్యూయర్ షిప్ పరంగా ఇది సరికొత్త రికార్డులు సృష్టిస్తుందని అంచనా వేస్తున్నారు. ప్రస్తుతం భారత జాతీయ జట్టు అంతర్జాతీయంగా ఇబ్బంది పడుతున్నప్పటికీ, ఫిఫాకు మాత్రం మన దేశం చాలా కీలకమైన మార్కెట్.
ఎందుకంటే ఇక్కడ యూరోపియన్ లీగ్లు, వరల్డ్ కప్ల క్రేజ్ వల్ల ఫుట్బాల్ పాపులారిటీ భారీగా పెరిగింది. ముఖ్యంగా కోల్కతా, కొచ్చి, గోవా, బెంగళూరు లాంటి నగరాల్లో ఫుట్బాల్కు విపరీతమైన ఆదరణ ఉంది. మెట్రో నగరాల్లోని యువత గ్లోబల్ స్టార్స్, క్లబ్లను అమితంగా ఫాలో అవుతున్నారు. మరోవైపు ఆసియా మార్కెట్ల కోసం ఫిఫా తన బిజినెస్ స్ట్రాటజీని కాస్త మార్చుకుంది. గతంతో పోలిస్తే చైనాకు దాదాపు 80 శాతం తగ్గింపు ధరకు 2026 వరల్డ్ కప్ హక్కులను ఇచ్చినట్లు సమాచారం.
అయితే ప్రపంచవ్యాప్తంగా చూస్తే ఈ టీవీ ప్రసార హక్కులకు యూరప్లోనే అత్యధిక ధరలు పలుకుతున్నాయి. నిజానికి భారత ఫుట్బాల్ జట్టు కష్టాల్లో ఉన్న సమయంలోనే ఈ బ్రాడ్కాస్ట్ డీల్ కుదరడం గమనార్హం. ఇటీవల వరుస ఓటముల వల్ల భారత పురుషుల జట్టు ఫిఫా ర్యాంకింగ్స్లో బాగా వెనుకబడింది. ఏఎఫ్సీ ఆసియా కప్నకు అర్హత సాధించిన తర్వాత ఆ జోరును కొనసాగించడంలో జట్టు విఫలమైంది. ఇది దేశీయ ఫుట్బాల్ వ్యవస్థలోని లోపాలను, కిందిస్థాయి అభివృద్ధి లేకపోవడాన్ని ఎత్తిచూపుతోంది.
