కలం, వెబ్ డెస్క్ : ప్రస్తుత కార్పొరేట్ ప్రపంచంలో ఒక ఆసక్తికరమైన మార్పు కనిపిస్తోంది. సీనియర్ అధికారులు ఇచ్చే ఆదేశాలను నేటి తరం జెన్ జీ (1997–2012 మధ్య పుట్టినవారు) ఉద్యోగులు (Gen Z Employees) గుడ్డిగా పాటించకుండా, ఆ పని ఎందుకు చేయాలో కారణాలను అడిగి తెలుసుకుంటున్నారు. ఇది ఎదురుతిరగడం కాదని, పని పట్ల స్పష్టతను కోరుకోవడమేనని మేనేజ్మెంట్ నిపుణులు విశ్లేషిస్తున్నారు. ఈ ధోరణి వల్ల పాతకాలపు ‘కమాండింగ్’ నాయకత్వం స్థానంలో ‘గైడింగ్’ (మార్గనిర్దేశం) చేసే పద్ధతి ప్రాముఖ్యత సంతరించుకుంది.
లీడర్లు ఇప్పుడు కేవలం పనులను పురమాయించకుండా, ఆ నిర్ణయాల వెనుక ఉన్న ఉద్దేశాలను వివరిస్తున్నారు. మైక్రోసాఫ్ట్ సీఈఓ సత్య నాదెళ్ల ఇందుకు ఒక ఉత్తమ ఉదాహరణగా నిలిచారు. 2014లో ఆయన బాధ్యతలు చేపట్టాక, అంతా మాకే తెలుసు అనే ‘know-it-all’ సంస్కృతిని మార్చి, నిరంతరం నేర్చుకునే ‘learn-it-all’ సంస్కృతిని ప్రవేశపెట్టారు. యువత గొంతుకకు ప్రాధాన్యం ఇవ్వడం వల్లే మైక్రోసాఫ్ట్ నేడు ప్రపంచంలోని అత్యంత విలువైన కంపెనీలలో ఒకటిగా నిలిచిందని ఆయన అభిప్రాయం వ్యక్తం చేశారు.
సోషల్ మీడియా ఒత్తిడి, ఆర్థిక అనిశ్చితి వంటి కారణాల వల్ల జెన్ జీ తరం అధిక ఆందోళనకు గురవుతున్నట్లు అధ్యయనాలు వెల్లడిస్తున్నాయి. అందుకే ఈ తరం ఉద్యోగులకు కేవలం మంచి జీతభత్యాలే కాకుండా, ఆఫీసులో ‘సైకలాజికల్ సేఫ్టీ’ (మానసిక భద్రత) కూడా చాలా అవసరం. గూగుల్ చేపట్టిన ‘ప్రాజెక్ట్ అరిస్టాటిల్’ పరిశోధనలో సైతం, ఉద్యోగులు భయం లేకుండా తమ ఆలోచనలను పంచుకునే చోటే అత్యుత్తమ ఫలితాలు వస్తాయని తేలింది. తప్పులు చేసినప్పుడు నిందించకుండా, వాటి నుంచి నేర్చుకునే వాతావరణాన్ని జెన్ జీ ఆశిస్తోంది.
నేటి కాలంలో జ్ఞానం కేవలం పైస్థాయి అధికారుల నుంచే కాకుండా, యువ ఉద్యోగుల నుంచి కూడా అందుతోంది. కొత్త టెక్నాలజీలు, ఏఐ టూల్స్ వంటి విషయాల్లో యువతకు ఉన్న అవగాహనను సీనియర్లు నేర్చుకునే ‘రివర్స్ మెంటరింగ్’ పద్ధతి ఇప్పుడు ప్రాచుర్యం పొందుతోంది. ఒక ప్రముఖ ఫార్చ్యూన్ 500 కంపెనీలో ఇంటర్న్ ఇచ్చిన ఐడియా ఆధారంగానే పెద్ద సస్టైనబిలిటీ ప్రాజెక్టు పట్టాలెక్కిన ఉదంతాలు దీనికి నిదర్శనం. అనుభవం కంటే ప్రతిభకే ఇక్కడ పెద్దపీట వేయడం జరుగుతోంది.
జెన్ జీ ఉద్యోగులు (Gen Z Employees) నాయకత్వం వద్దు అనడం లేదు, కానీ మెరుగైన నాయకత్వాన్ని కోరుకుంటున్నారు. ఆదేశించే బాస్ కంటే, తమను అర్థం చేసుకుని నడిపించే మార్గదర్శి కోసం వారు ఎదురుచూస్తున్నారు. ఈ మార్పును అంగీకరించే నాయకులు, సంస్థలు భవిష్యత్తులో మరింత సృజనాత్మకంగా, సమర్థవంతంగా రాణించే అవకాశం ఉంది.
