Kashibugga Stampede | శ్రీకాకుళం జిల్లా కాశీబుగ్గలోని శ్రీ వేంకటేశ్వరస్వామి ఆలయంలో జరిగిన విషాద ఘటన రాష్ట్రాన్ని కుదిపేసింది. కార్తిక మాసం ఉత్థాన ఏకాదశి సందర్భంగా భక్తుల రద్దీ పెరగడంతో జరిగిన తొక్కిసలాటలో తొమ్మిది మంది భక్తులు దుర్మరణం పాలవ్వగా, మరో 25 మంది తీవ్రంగా గాయపడ్డారు. ఆదివారం ఉదయం కాశీబుగ్గకు వెళ్లిన కేంద్రమంత్రి రామ్మోహన్‌నాయుడు, రాష్ట్ర మంత్రి అచ్చెన్నాయుడు మృతుల కుటుంబాలను పరామర్శించారు. మృతుల కుటుంబాలకు ఒక్కో కుటుంబానికి రూ.15 లక్షల చొప్పున ఆర్థిక సాయాన్ని అందజేశారు. బాధిత కుటుంబాలకు పూర్తి సహాయం అందిస్తామని వారు హామీ ఇచ్చారు.
మంత్రులు అనంతరం మీడియాతో మాట్లాడారు. అచ్చెన్నాయుడు(Atchannaidu) మాట్లాడుతూ ఈ ఘటన తనను తీవ్రంగా కలిచివేసిందని, ఇది ఎవరూ ఊహించని దుర్ఘటన అని అన్నారు. “భక్తుల ప్రాణాలు కోల్పోవడం బాధాకరం. వారి కుటుంబాలకు అండగా ప్రభుత్వం నిలుస్తుంది. భవిష్యత్తులో ఇలాంటి విషాదాలు జరగకుండా తగిన భద్రతా చర్యలు తీసుకుంటాం,” అని తెలిపారు.
ఈ సందర్భంగా కేంద్రమంత్రి రామ్మోహన్‌నాయుడు(Ram Mohan Naidu) మాట్లాడుతూ, కాశీబుగ్గ ఆలయం ప్రాంతంలో జనసంచారం ఎక్కువగా ఉంటుందని, పండుగల సమయంలో ప్రత్యేక నియంత్రణ చర్యలు అవసరమని సూచించారు. కేంద్ర, రాష్ట్ర ప్రభుత్వాలు కలిసి భవిష్యత్తులో ఇలాంటి ప్రమాదాలు జరగకుండా సమగ్ర ప్రణాళిక రూపొందిస్తాయని చెప్పారు.
శనివారం ఉదయం నుంచి కార్తిక ఏకాదశి పర్వదినం కావడంతో ఆలయం భక్తులతో కిటకిటలాడింది. స్వామి దర్శనానికి వేలాది మంది చేరుకున్నారు. ఉదయం 11.45 గంటల సమయంలో భక్తులు పెద్ద ఎత్తున గర్భగుడి వైపు ప్రవేశించే ప్రయత్నం చేయడంతో తోపులాట మొదలైంది. కొద్ది సేపటికే పరిస్థితి అదుపుతప్పి తొక్కిసలాటకు దారితీసింది. సంఘటన స్థలంలోనే పలువురు కూలిపోయి ప్రాణాలు కోల్పోయారు.
వారిలో ఎనిమిది మంది మహిళలు, ఒక బాలుడు ఉన్నట్లు అధికారులు తెలిపారు. గాయపడిన వారిని తక్షణమే సమీప ఆసుపత్రులకు తరలించారు. కొంతమంది పరిస్థితి ఇంకా విషమంగా ఉందని వైద్యులు తెలిపారు.
ఘటన జరిగిన వెంటనే జిల్లా యంత్రాంగం, పోలీసులు, రెవెన్యూ సిబ్బంది, వైద్య బృందాలు సహాయక చర్యల్లో పాల్గొన్నాయి. ఆలయ పరిసరాల్లో రక్షణ చర్యలు చేపట్టి గాయపడిన వారికి తక్షణ వైద్య సహాయం అందించారు. రాష్ట్ర ప్రభుత్వం ఈ ఘటనపై సమగ్ర విచారణకు ఆదేశించింది.
స్థానికులు మాట్లాడుతూ, ప్రతి సంవత్సరం కార్తిక మాసంలో భారీ రద్దీ ఉంటుందని, అయితే ఈసారి ఏర్పాట్లు తగినంతగా లేకపోవడం వల్లే ప్రమాదం జరిగిందని ఆవేదన వ్యక్తం చేశారు. భక్తుల ప్రవేశం, వెళ్లిపోయే మార్గాలు సరైన పద్ధతిలో లేకపోవడం, పోలీస్‌ నియంత్రణ తక్కువగా ఉండడం వలన తొక్కిసలాట(Kashibugga Stampede) జరిగింది అని వారు అభిప్రాయపడ్డారు. ప్రస్తుతం కాశీబుగ్గ ప్రాంతం విషాద వాతావరణంలో మునిగిపోయింది. బాధిత కుటుంబాలు కన్నీరు మున్నీరవుతూ తమ బంధువుల అంత్యక్రియలకు సిద్ధమవుతున్నారు. ప్రభుత్వ పరామర్శ, ఆర్థిక సాయం కొంత ఉపశమనం కలిగించినా, కోల్పోయిన ప్రాణాలను ఎవరూ తిరిగి తెచ్చలేరు. ప్రజల ప్రాణాలు రక్షించడంలో భవిష్యత్తులో ప్రభుత్వం మరింత జాగ్రత్తలు తీసుకోవాలని స్థానిక భక్తులు, సామాజిక సంస్థలు కోరుతున్నాయి.
Read Also: నకిలీ మద్యం కేసులో సంచలనం.. వైసీపీ కీలక నేత అరెస్ట్
Follow Us On : Instagram
