కలం, స్పోర్ట్స్ : సచిన్ టెండూల్కర్ పేరు చెబితే బ్యాటింగ్లో తిరుగులేని రికార్డులు గుర్తుకొస్తాయి. కానీ ఆల్టైమ్ గ్రేటెస్ట్ క్రికెటర్ ఎవరు అంటే బ్రెట్ లీ (Brett Lee) మాత్రం మరో పేరును ఎంచుకున్నాడు. సచిన్ను అత్యుత్తమ బ్యాటర్గా కీర్తిస్తూనే.. జాక్వెస్ కలిస్నే క్రికెట్లో GOATగా పేర్కొన్నాడు. ఆస్ట్రేలియా మాజీ పేసర్ బ్రెట్ లీ ఈ విషయంపై తన అభిప్రాయాన్ని వెల్లడించాడు. ఓ పాడ్కాస్ట్లో మాట్లాడిన లీ.. క్రికెట్లో సచిన్ కంటే గొప్ప బ్యాటర్ను తాను చూడలేదని చెప్పాడు. అయితే బ్యాటింగ్తో పాటు బౌలింగ్, ఫీల్డింగ్ను కూడా పరిగణనలోకి తీసుకుంటే జాక్వెస్ కలిస్దే అగ్రస్థానం అని లీ అభిప్రాయపడ్డాడు. కలిస్ గణాంకాలు దీనికి బలమైన నిదర్శనమని పేర్కొన్నాడు.
కలిస్ దక్షిణాఫ్రికా తరఫున అద్భుతమైన ఆల్రౌండర్గా నిలిచాడు. టెస్టుల్లో 13,289 పరుగులు చేశాడు. అతడి బ్యాటింగ్ సగటు 55.37. ఈ ఫార్మాట్లో 45 సెంచరీలు కూడా ఉన్నాయి. బౌలింగ్లోనూ కలిస్ సత్తా చాటాడు. టెస్టుల్లో 292 వికెట్లు పడగొట్టాడు. అంతేకాదు.. 200 క్యాచ్లు అందుకున్నాడు. వన్డేల్లోనూ కలిస్ రికార్డు భారీగానే ఉంది. 11,579 పరుగులు చేశాడు. అతడి బ్యాటింగ్ సగటు 44.36. ఈ ఫార్మాట్లో 17 సెంచరీలు ఉన్నాయి. బౌలర్గా 273 వికెట్లు సాధించాడు.
కలిస్తో కలిసి ఆడిన అనుభవం కూడా బ్రెట్ లీకి ఉంది. ఇద్దరూ ఐపీఎల్లో కోల్కతా నైట్ రైడర్స్ తరఫున కొంతకాలం కలిసి ఆడారు. ఆ సమయంలో కలిస్ ఆటపట్ల చూపిన ప్రశాంతతను లీ గుర్తుచేసుకున్నాడు. మ్యాచ్కు ముందు కూడా కలిస్ చాలా కూల్గా ఉండేవాడని చెప్పాడు. పరిస్థితి ఎలా ఉన్నా.. బ్యాటింగ్కు వెళ్లే ముందు అతడిలో ఎలాంటి ఆందోళన కనిపించేది కాదని వివరించాడు.
అదే ప్రశాంతత అతడి ఆటలోనూ కనిపించేదని లీ అభిప్రాయపడ్డాడు. ఒత్తిడిని ఎదుర్కొంటూనే బ్యాటింగ్, బౌలింగ్, ఫీల్డింగ్లో జట్టుకు ఉపయోగపడే ఆటగాడిగా కలిస్ నిలిచాడని చెప్పాడు. మొత్తంగా చూస్తే.. సచిన్ టెండూల్కర్ను అత్యుత్తమ బ్యాటర్గా బ్రెట్ లీ గౌరవించాడు. కానీ అన్ని విభాగాల్లోనూ ప్రభావం చూపిన ఆటగాడిగా జాక్వెస్ కలిస్ను ఎంచుకున్నాడు. అందుకే తన దృష్టిలో క్రికెట్లో ఆల్టైమ్ GOAT కలిస్నే అని స్పష్టం చేశాడు.
