కలం, వెబ్డెస్క్: విజయ్ హజారే ట్రోఫీ (Vijay Hazare Trophy)లో తెలుగు జట్లకు మరో ఓటమి ఎదురైంది. సోమవారం జరిగిన మ్యాచ్ల్లో ఆంధ్ర, హైదరాబాద్ పరాజయం పాలయ్యాయి. గ్రూప్–డిలో భాగంగా బెంగుళూరులో ఒడిశాతో జరిగిన మ్యాచ్లో ఆంధ్ర 6 వికెట్ల తేడాతో ఓడిపోయింది. ఈ మ్యాచ్లో తొలుత బ్యాటింగ్ చేసిన ఆంధ్ర 49.2 ఓవర్లలో 221 పరుగులకు ఆలౌట్ అయ్యింది. ఎస్డీఎన్వీ ప్రసాద్(66; 64 బంతుల్లో 6 ఫోర్లు, 2 సిక్స్లు) అర్ధ సెంచరీ చేయగా, చివర్లో సౌరభ్ కుమార్ (47; 26 బంతుల్లో 3 ఫోర్లు, 4 సిక్స్లు) మెరుపులు మెరిపించాడు. కెప్టెన్ నితీశ్ కుమార్ రెడ్డి (6) నిరాశపర్చాడు. ఒడిశా బౌలర్లలో గోవింద పొద్దర్, బిప్లబ్ సమంత్రాయ్ చెరో 3 వికెట్లు పడగొట్టారు. లక్ష్యాన్ని ఒడిశా 43.4 ఓవర్లలో 4 వికెట్లు కోల్పోయి అందుకుంది. ఓపెనర్ ఓమ్ టి ముండే (91), గోవింద పొద్దర్(89) అర్ధసెంచరీలతో తమ జట్టు గెలుపులో కీలకపాత్ర పోషించారు. ఆంధ్ర బౌలర్లలో సత్యనారాయణ రాజు 2 వికెట్లు తీయగా, నితీశ్, హేమంత్ చెరో వికెట్ పడగొట్టారు. ఇది ఆంధ్రకు మూడు మ్యాచ్ల్లో రెండో ఓటమి.
వరుసగా మూడో పరాజయం..:
గ్రూప్–బిలో భాగంగా రాజ్కోట్ వేదికగా అస్సాంతో జరిగిన మ్యాచ్లో హైదరాబాద్ నాలుగు వికెట్ల తేడాతో ఓడిపోయింది. తొలుత బ్యాటింగ్ చేసిన హైదరాబాద్ 50 ఓవర్లలో 8 వికెట్లు కోల్పోయి 310 పరుగులు చేసింది. రాహుల్ సింగ్(79; 71 బంతుల్లో 14 ఫోర్లు), అభిరత్ రెడ్డి (54; 66 బంతుల్లో 6 ఫోర్లు), నితీశ్ రెడ్డి (53; 25 బంతుల్లో 4 ఫోర్లు, 3 సిక్స్లు) అర్ధసెంచరీలతో రాణించారు. అస్సాం బౌలర్లలో అబ్దుల్ అజీజ్ 3, స్వరూపమ్ పుర్కాయస్థ, శిబ్శంకర్ రాయ్ చెరో 2 వికెట్లు తీశారు. శిబ్శంకర్ రాయ్(112; 109 బంతుల్లో 11 ఫోర్లు, 1 సిక్స్) సెంచరీకి తోడు సౌరవ్ దిహింగియా (91), డేనిష్ దాస్(54) అర్ధసెంచరీలు చేయడంతో లక్ష్యాన్ని అస్సాం 6 వికెట్లు కోల్పోయి, మరో 3 బంతులు ఉండగా అందుకుంది. హైదరాబాద్ బౌలర్లలో సీవీ మిలింద్ 3, వరుణ్ గౌడ్ 1 వికెట్ తీశారు. ఇది టోర్నీ (Vijay Hazare Trophy) లో హైదరాబాద్కు వరుసగా మూడో పరాజయం.
Read Also: అదరగొట్టిన అభిషేక్.. 60 నిమిషాల్లో 45 సిక్సర్లు
Follow Us On: Pinterest
