కలం, నిర్మల్ : సోన్ మండలం న్యూ బొప్పారం గ్రామంలో నిర్వహించిన బొప్పారం ప్రీమియర్ లీగ్ (BPL) సీజన్-10 క్రికెట్ టోర్నమెంట్కు ఆదివారం ఘనంగా తెరపడింది. ఉత్కంఠభరితంగా సాగిన ఫైనల్ పోరులో కడ్తాల్ జట్టు అద్భుత ఆటతీరుతో కూచన్పల్లి జట్టును ఓడించి విజేతగా నిలిచింది. మొదట బ్యాటింగ్ చేసిన కడ్తాల్ జట్టు నిర్ణీత 12 ఓవర్లలో 8 వికెట్లు కోల్పోయి 120 పరుగులు చేసింది.
అనంతరం లక్ష్యఛేదనకు దిగిన కూచన్పల్లి జట్టు కడ్తాల్ బౌలర్ల కట్టుదిట్టమైన బౌలింగ్ను ఎదుర్కోలేక 8 వికెట్లు కోల్పోయి 85 పరుగులకే పరిమితమైంది. దీంతో కడ్తాల్ జట్టు 35 పరుగుల తేడాతో ఘన విజయం సాధించి బీపీఎల్ సీజన్-10 ట్రోఫీని సొంతం చేసుకుంది. మ్యాచ్ అనంతరం విజేత జట్టుకు ట్రోఫీతో పాటు నగదు బహుమతిని నిర్వాహకులు అందజేశారు.
ఈ టోర్నమెంట్లో అత్యుత్తమ ప్రతిభ కనబరిచిన సుధీర్ కు మ్యాన్ ఆఫ్ ది టోర్నమెంట్ అవార్డు లభించగా, బర్మ అరవింద్ బెస్ట్ బ్యాట్స్మన్, ప్రశాంత్ బెస్ట్ బౌలర్ గా ఎంపికయ్యారు. ఈ సందర్భంగా నిర్వాహకులు మాట్లాడుతూ.. యువత మత్తు పదార్థాలకు దూరంగా ఉండి క్రీడలు, చదువుపై దృష్టి సారించేలా ఐపీఎల్ తరహాలో ప్రతి సంవత్సరం బీపీఎల్ క్రికెట్ టోర్నమెంట్ను నిర్వహిస్తున్నామని తెలిపారు.
