కలం, వెబ్ డెస్క్ : సూర్యాపేట జిల్లా కోదాడ (Kodad Blast ) పట్టణంలోని రంగ థియేటర్ సమీపంలో ఒక్కసారిగా భారీ పేలుడు సంభవించడం తీవ్ర కలకలం సృష్టించింది. పేలుడు శబ్ధం వినిపించడంతో పరిసర ప్రాంతమంతా ఒక్కసారిగా దద్ధరిల్లగా.. సమీపంలో ఉన్న వారు భయంతో రోడ్డుపై పరుగులు తీశారు. ఈ ఘటనలో ఎలాంటి ప్రాణనష్టం జరగకపోవడంతో అందరూ ఊపిరి పీల్చుకున్నారు.
కాగా, గల్లీలో ఉన్న ఎల్పిజి గ్యాస్ రీఫిల్ చేసే ఒక షాపు నుంచే ఈ పేలుడు జరిగి ఉండొచ్చని అనుమానాలు వ్యక్తం అవుతున్నాయి. దాని సమీపంలోని జ్యూస్ సెంటర్ షాపు మొత్తం ఒక్కసారిగా కంపించిన దృశ్యాలు అక్కడ ఏర్పాటు చేసిన సీసీటీవీ కెమెరాల్లో నమోదయ్యాయి. ప్రస్తుతం ఆ వీడియో సోషల్ మీడియాలో వైరల్ అవుతోంది. ప్రమాదంపై సమాచారం అందుకున్న పోలీసులు ఘటన స్థలానికి చేరుకున్నారు. ఘటనపై కేసు నమోదు చేసి దర్యాప్తు చేపట్టారు.
