కలం, వెబ్ డెస్క్: రాయ్పూర్లో కింగ్ కోహ్లీ (Virat Kohli) వన్ మ్యాన్ షో చూపించాడు. ఛేజింగ్ కింగ్ విరాట్ కోహ్లీ మరోసారి తన క్లాస్ చూపించాడు. అజేయ సెంచరీతో చెలరేగిన కోహ్లీ.. కోల్కతా నైట్ రైడర్స్పై రాయల్ ఛాలెంజర్స్ బెంగళూరుకు అద్భుత విజయాన్ని అందించాడు. 193 పరుగుల భారీ లక్ష్యాన్ని ఆర్సీబీ మరో 5 బంతులు మిగిలి ఉండగానే 6 వికెట్ల తేడాతో ఛేదించింది. ఈ విజయంతో పాయింట్ల పట్టికలో కూడా బెంగళూరు తన స్థానాన్ని మరింత బలోపేతం చేసుకుంది.
మొదట బ్యాటింగ్ చేసిన కోల్కతా నైట్ రైడర్స్ నిర్ణీత 20 ఓవర్లలో 4 వికెట్ల నష్టానికి 192 పరుగులు చేసింది. యువ బ్యాటర్ అంగ్క్రిష్ రఘువంశీ అద్భుత ఇన్నింగ్స్ ఆడాడు. 46 బంతుల్లో 7 ఫోర్లు, 3 సిక్సర్లతో 71 పరుగులు చేసి జట్టుకు బలమైన స్కోర్ అందించాడు. మరోవైపు చివరి ఓవర్లలో రింకూ సింగ్ వేగంగా ఆడుతూ 29 బంతుల్లో 49 పరుగులతో నాటౌట్గా నిలిచాడు. అతని ఇన్నింగ్స్లో 3 ఫోర్లు, 2 భారీ సిక్సర్లు ఉన్నాయి. ఈ ఇద్దరి దూకుడుతో కేకేఆర్ 190కి పైగా స్కోర్ నమోదు చేసింది. ఆర్సీబీ బౌలర్లలో భువనేశ్వర్ కుమార్, జోష్ హేజిల్వుడ్, రసిఖ్ సలాం తలో వికెట్ తీశారు. అయితే డెత్ ఓవర్లలో కేకేఆర్ బ్యాటర్లు వేగంగా పరుగులు రాబట్టడంతో బెంగళూరు బౌలర్లు ఒత్తిడిని ఎదుర్కొన్నారు.
193 పరుగుల లక్ష్యంతో బరిలోకి దిగిన ఆర్సీబీకి ఆరంభంలోనే జాకబ్ బెథెల్ వికెట్ కోల్పోయినా, విరాట్ కోహ్లీ మాత్రం ఎక్కడా తడబడలేదు. మొదటి నుంచే కేకేఆర్ బౌలర్లపై ఆధిపత్యం చెలాయించిన కోహ్లీ.. 60 బంతుల్లోనే 11 ఫోర్లు, 3 సిక్సర్లతో అజేయంగా 105 పరుగులు చేశాడు. చివరి వరకు క్రీజులో నిలిచి జట్టును విజయానికి చేర్చాడు. దేవదత్ పడిక్కల్ కూడా వేగంగా ఆడి 27 బంతుల్లో 39 పరుగులు చేసి కోహ్లీకి అద్భుత సహకారం అందించాడు. అతని ఇన్నింగ్స్లో 7 ఫోర్లు ఉన్నాయి. రజత్ పటిదార్ 11 పరుగులు చేసి అవుట్ కాగా, టిమ్ డేవిడ్ కేవలం 2 పరుగులకే పెవిలియన్ చేరాడు. చివర్లో జితేష్ శర్మతో కలిసి కోహ్లీ విజయాన్ని పూర్తి చేశాడు.
కేకేఆర్ బౌలర్లలో కార్తీక్ త్యాగి ఒంటరి పోరాటం చేశాడు. 4 ఓవర్లలో 32 పరుగులిచ్చి 3 కీలక వికెట్లు తీశాడు. బెథెల్, పడిక్కల్, టిమ్ డేవిడ్ వికెట్లు తీసి మ్యాచ్ను మలుపుతిప్పే ప్రయత్నం చేశాడు. సునీల్ నరైన్ ఒక వికెట్ సాధించాడు. కానీ వైభవ్ అరోరా, అనుకుల్ రాయ్ భారీగా పరుగులు ఇవ్వడంతో కోహ్లీని అడ్డుకోవడం కేకేఆర్కు సాధ్యం కాలేదు.
