కలం, వలిగొండ: రాష్ట్ర ప్రభుత్వం భూముల విలువలను సవరించనున్న నేపథ్యంలో వలిగొండ (Valigonda) మండల కేంద్రంలోని తహసీల్దార్, జాయింట్ సబ్ రిజిస్ట్రార్ కార్యాలయం (Sub Registrar Office) గురువారం కొనుగోలుదారులు, అమ్మకందారులతో కిటకిటలాడింది. ఈ నెల 5వ తేదీ (శుక్రవారం) నుండి కొత్త భూముల విలువలు అమల్లోకి రానున్నాయి. దీంతో రిజిస్ట్రేషన్ చార్జీల భారం అదనంగా పడనుండటంతో, ఆ లోపే తమ భూముల రిజిస్ట్రేషన్ ప్రక్రియను ముగించుకోవాలని జనం భారీగా తరలివచ్చారు. భూముల మార్కెట్ విలువ పెరిగితే రిజిస్ట్రేషన్ ఫీజులు కూడా భారీగా పెరుగుతాయన్న ముందస్తు సమాచారంతో, రిజిస్ట్రేషన్ల కోసం గురువారం నాటికే పెద్ద సంఖ్యలో స్లాట్లు బుక్ అయ్యాయి.
పెరిగే చార్జీల భారం నుండి తప్పించుకోవడానికి ఒకే రోజు వందలాది మంది దరఖాస్తుదారులు కార్యాలయానికి చేరుకోవడంతో ఒక్కసారిగా అక్కడ పండగ వాతావరణం నెలకొంది. రిజిస్ట్రేషన్ ప్రక్రియలో సాక్షులు, కుటుంబ సభ్యుల సంతకాలు అవసరం కావడంతో కొనుగోలుదారులు, అమ్మకందారులు తమ కుటుంబాలతో సహా కార్యాలయానికి తరలివచ్చారు. వృద్ధులు, మహిళలు, చిన్న పిల్లలతో కార్యాలయ ప్రాంగణం అంతా కిక్కిరిసిపోయింది. ఎండ తీవ్రతను సైతం లెక్కచేయకుండా గంటల తరబడి వేచి చూస్తూ తమ రిజిస్ట్రేషన్లను పూర్తి చేసుకునేందుకు ప్రజలు ఆరాటపడ్డారు.
ఒత్తిడిలో రెవెన్యూ సిబ్బంది
ఒక్కసారిగా వందలాది మంది రిజిస్ట్రేషన్ల కోసం రావడంతో తహసీల్దార్ కార్యాలయ సిబ్బందిపై తీవ్ర పనిభారం పడింది. అదనపు రద్దీని తట్టుకుంటూ, సాంకేతిక ఇబ్బందులు తలెత్తకుండా ప్రక్రియను వేగంగా పూర్తి చేసేందుకు అధికారులు, కంప్యూటర్ ఆపరేటర్లు శ్రమించాల్సి వచ్చింది. ప్రభుత్వ ఆదాయం పెంచేందుకు భూముల విలువలను పెంచడం సాధారణమే అయినప్పటికీ, మధ్యతరగతి, పేద ప్రజలపై ఈ భారం పడకుండా ఉండేందుకు చివరి నిమిషంలో జనం చూపిన శ్రద్ధే ఈ రద్దీకి ప్రధాన కారణం. రిజిస్ట్రేషన్ల ద్వారా ప్రభుత్వ ఖజానాకు గురువారం ఒక్కరోజే భారీగా ఆదాయం సమకూరినట్లు తెలుస్తోంది.
Read Also: బైకర్లకు ఎయిర్ బ్యాగ్.. కరీంనగర్ విద్యార్థికి జాతీయ గుర్తింపు
Follow Us On: X(Twitter)
