కలం, వెబ్ డెస్క్: హైదరాబాద్లో తాగునీటి సమస్యలు పరిష్కరించకపోతే జలమండలిని ముట్టడిస్తామని మాజీ మంత్రి, ఎమ్మెల్యే తలసాని శ్రీనివాస్ యాదవ్ (Talasani Srinivas Yadav) హెచ్చరించారు. తాగునీటి సమస్యలపై ప్రభుత్వం తక్షణమే స్పందించాలని డిమాండ్ చేశారు. ఓటర్ల జాబితా సమగ్ర సవరణ ప్రక్రియను స్వీపర్లు, నాల్గవ తరగతి ఉద్యోగులతో నిర్వహించడం ప్రజాస్వామ్యానికి విరుద్ధమని ఆయన విమర్శించారు. అర్హులైన అధికారులతో పారదర్శకంగా ఈ ప్రక్రియ చేపట్టాలని సూచించారు.
నగరంలోని పలు ప్రాంతాల్లో తీవ్ర తాగునీటి సమస్య నెలకొన్నప్పటికీ ప్రభుత్వం పట్టించుకోవడం లేదని విమర్శించారు. వేసవి తీవ్రత పెరిగిన నేపథ్యంలో ప్రజలు నీటి కోసం ఇబ్బందులు పడుతున్నారని, కొన్ని కాలనీల్లో రోజులు గడిచినా సరైన నీటి సరఫరా లేక ప్రజలు తీవ్ర ఇబ్బందులు ఎదుర్కొంటున్నారని అన్నారు. జలమండలి అధికారులు సమస్య పరిష్కారంలో విఫలమయ్యారని విమర్శించారు.
ప్రభుత్వం వెంటనే స్పందించి నగర ప్రజలకు తాగునీటిని సమృద్ధిగా అందించేలా చర్యలు తీసుకోవాలని ఆయన డిమాండ్ చేశారు. నీటి సమస్యల పరిష్కారంపై జూన్ 5లోగా స్పష్టమైన హామీ ఇవ్వకపోతే జలమండలి కార్యాలయాన్ని ముట్టడిస్తామని హెచ్చరించారు. ప్రజలకు అవసరమైన మౌలిక సదుపాయాలు కల్పించడంలో ప్రభుత్వం విఫలమైతే పెద్ద ఎత్తున ఆందోళనలు చేపడతామని తెలిపారు.
ఓటర్ల జాబితా సవరణ ప్రక్రియలో నిర్లక్ష్యం చోటుచేసుకుంటే ప్రజాస్వామ్య వ్యవస్థపైనే ప్రభావం పడుతుందని తలసాని (Talasani Srinivas Yadav) పేర్కొన్నారు. ఎన్నికల ప్రక్రియను నిష్పక్షపాతంగా నిర్వహించాల్సిన బాధ్యత ప్రభుత్వంపై ఉందన్నారు. ప్రజా సమస్యల పరిష్కారంలో ప్రభుత్వం బాధ్యతాయుతంగా వ్యవహరించాలని కోరారు.
Read Also: అడ్వకేట్ ఖాజా మొయిజుద్దీన్ హత్య కేసు : కాంగ్రెస్ నేత అరెస్టు !
Read Also: పెట్రో బాదుడు పాపం తలా పిడికెడు
