కలం, స్పోర్ట్స్: వింబుల్డన్లో తొలి రౌండ్లోనే నిష్క్రమించిన టెన్నిస్ దిగ్గజం సెరెనా విలియమ్స్ (Serena Williams) ఎట్టకేలకు తన ఓటమిపై స్పందించింది. మ్యాచ్ తర్వాత మీడియాతో మాట్లాడకుండా వెళ్లిపోయిన ఆమె.. సోషల్ మీడియాలో తన మనసులోని భావాలను పంచుకుంది. మోకాలి గాయం ఇబ్బంది పెట్టినా డబుల్స్ కోసం సిద్ధమవుతానని స్పష్టం చేసింది. ఆల్ ఇంగ్లండ్ క్లబ్లో జరిగిన తొలి రౌండ్లో మాయా జాయింట్తో సెరెనా తలపడింది. తొలి సెట్ చివర్లో ఆమె కుడి మోకాలికి గాయమైంది. అయినా పోరాటం ఆపలేదు. రెండు గంటల 22 నిమిషాల పాటు పోరాడిన తర్వాత 6-3, 6-7(6), 6-3 తేడాతో ఓటమి పాలైంది.
వింబుల్డన్లో మళ్లీ ఆడే అవకాశం కల్పించిన నిర్వాహకులకు సెరెనా కృతజ్ఞతలు తెలిపింది. తిరిగి గడ్డి కోర్టులో ఆడటం ఎంతో ఆనందంగా అనిపించిందని పేర్కొంది. తన కుమార్తెలు అడిరా, ఒలింపియా ఎదుట తాను కలల కోసం ఇంకా పోరాడుతున్నానని చూపించగలిగినందుకు సంతోషంగా ఉందని సెరెనా తెలిపింది. జీవితంలో ఇష్టమైన లక్ష్యాన్ని సాధించడానికి ఎప్పుడూ ఆలస్యం కాదనే విషయాన్ని వారికి చూపించాలనుకున్నట్లు వెల్లడించింది.
మొదటి సెట్ చివర్లో మోకాలికి గాయం అయినప్పటికీ, వీనస్ విలియమ్స్తో కలిసి డబుల్స్ ఆడేందుకు పూర్తిగా సిద్ధమయ్యేలా ప్రయత్నిస్తానని సెరెనా తెలిపింది. అలాగే తొలి రౌండ్లో అద్భుతంగా ఆడిన మాయా జాయింట్ను అభినందించింది. తనకు అండగా నిలిచిన అభిమానుల ప్రేమను ఎప్పటికీ మర్చిపోలేనని పేర్కొంది.
