కలం, ఖమ్మం బ్యూరో: ఒడిశా నుంచి హైదరాబాద్కు కారులో అక్రమంగా గంజాయిని తరలిస్తున్న ఇద్దరు వ్యక్తులను సత్తుపల్లి (Sathupalli) పోలీసులు శుక్రవారం అరెస్ట్ చేసి రిమాండ్కు తరలించారు. ఈ ఘటనకు సంబంధించిన వివరాలను సత్తుపల్లి ఇన్స్పెక్టర్ శ్రీహరి వెల్లడించారు. ఒడిశా కారులో గంజాయిని అక్రమంగా రవాణా చేస్తున్నారనే విశ్వసనీయ సమాచారం మేరకు, కల్లూరు ఏసీపీ వసుంధర యాదవ్ పర్యవేక్షణలో ఈగల్ టీమ్ సత్తుపల్లి పోలీస్ సిబ్బంది సంయుక్తంగా వాహన తనిఖీలు నిర్వహించారు. ఈ తనిఖీల సమయంలో అనుమానాస్పదంగా కనిపించిన కారును ఆపి, అందులో ఉన్న ఇద్దరు వ్యక్తులను అదుపులోకి తీసుకుని విచారించారు.
విచారణలో నిందితులు ఒడిశా రాష్ట్రం కోరాపుట్కు చెందిన కామేష్ మారి, కారా రాజేంద్రగా గుర్తించారు. నిందితుల నుంచి 6.36 కేజీల గంజాయితో పాటు, కారు, రెండు మొబైల్ ఫోన్లను పోలీసులు స్వాధీనం చేసుకున్నారు. ఈ ఘటనపై ఎన్డీపీఎస్ యాక్ట్ ప్రకారం కేసు నమోదు చేసి, నిందితులను రిమాండ్కు తరలించినట్లు సీఐ శ్రీహరి పేర్కొన్నారు.
