కలం, స్పోర్ట్స్ : ఫిఫా ప్రపంచకప్ (FIFA World Cup) వేదికపై భారత మూలాలు ఉన్న ఆటగాడు కొత్త చరిత్ర సృష్టించాడు. న్యూజిలాండ్ మిడ్ఫీల్డర్ సర్ప్రీత్ సింగ్ (Sarpreet Singh) ప్రపంచకప్ మ్యాచ్లో ఆరంభ జట్టులో చోటు దక్కించుకున్న తొలి భారత సంతతి ఆటగాడిగా నిలిచాడు. ఆక్లాండ్లో పంజాబీ కుటుంబంలో జన్మించిన 27 ఏళ్ల సర్ప్రీత్ సింగ్, ఇరాన్తో జరిగిన గ్రూప్-జి మ్యాచ్లో న్యూజిలాండ్ తరఫున తొలి జట్టులో ఆడాడు. నంబర్-10 జెర్సీతో బరిలోకి దిగిన అతడు దాదాపు పూర్తి మ్యాచ్ ఆడాడు. మూడు సార్లు గోల్ ప్రయత్నాలు చేశాడు. ఈ మ్యాచ్ 2-2తో డ్రాగా ముగిసింది.
న్యూజిలాండ్ కోచ్ డారెన్ బేజ్లీ అతనిపై నమ్మకం ఉంచి 90వ నిమిషం వరకు మైదానంలో కొనసాగించారు. న్యూజిలాండ్ తదుపరి మ్యాచ్ను జూన్ 21న ఈజిప్ట్తో వాంకోవర్లో ఆడనుంది. సర్ప్రీత్కు భారత్తో కూడా ప్రత్యేక అనుబంధం ఉంది. 2018 ఇంటర్కాంటినెంటల్ కప్లో ముంబైలో ఆడిన అతడు భారత కెప్టెన్ సునీల్ ఛెత్రికి ప్రత్యర్థిగా బరిలోకి దిగాడు. కెన్యాపై గోల్ చేయడంతో పాటు భారత్పై న్యూజిలాండ్ విజయంలో రెండు అసిస్టులు కూడా అందించాడు. అయితే ఆ టోర్నీ టైటిల్ను భారత్ గెలుచుకుంది.
2019లో జర్మనీ అగ్రశ్రేణి లీగ్లో ఆడిన తొలి భారత సంతతి ఆటగాడిగా మరో ఘనత సాధించాడు. బాయర్న్ మ్యూనిక్ తరఫున అరంగేట్రం చేసి, తర్వాత బుండెస్లిగా విజేత జట్టులో కూడా సభ్యుడిగా నిలిచాడు. పోర్చుగల్, సెర్బియాలో క్లబ్ క్రికెట్ కాకుండా ఫుట్బాల్ ప్రయాణం కొనసాగించిన సర్ప్రీత్, ఈ ఏడాది తిరిగి న్యూజిలాండ్కు వచ్చాడు. గాయం నుంచి కోలుకుని ప్రపంచకప్ జట్టులో చోటు సంపాదించాడు. ఇప్పటివరకు ప్రపంచకప్లో భారత మూలాలు ఉన్న ఆటగాళ్లలో ఫ్రాన్స్కు చెందిన వికాష్ ధొరాసూ మాత్రమే ఆడాడు.
2006 ప్రపంచకప్లో అతడు ప్రత్యామ్నాయ ఆటగాడిగా బరిలోకి దిగాడు. ఇప్పుడు సర్ప్రీత్ (Sarpreet Singh) తొలి జట్టులోనే ఆడి కొత్త మైలురాయిని అందుకున్నాడు. ఈ ప్రపంచకప్లో భారత సంతతికి చెందిన మరో ముగ్గురు ఆటగాళ్లు కూడా వివిధ జట్లలో ఉన్నారు. ఆస్ట్రేలియాకు చెందిన నిషాన్ వేలుపిళ్లై ఇప్పటికే టోర్నీలో అరంగేట్రం చేశాడు. ఖతార్కు చెందిన తహ్సిన్ మొహమ్మద్ జంశీద్, డీఆర్ కాంగోకు చెందిన సామ్యూయెల్ మౌటుస్సామీ కూడా జట్లలో ఉన్నారు. ప్రపంచకప్లో భారత మూలాలు ఉన్న ఆటగాళ్ల సంఖ్య పెరుగుతుండటం ప్రపంచ ఫుట్బాల్లో వారి ప్రాతినిధ్యాన్ని మరోసారి చర్చకు తీసుకొచ్చింది.
Read Also: శ్రీలంక మాజీ కెప్టెన్ను ఆకట్టుకున్న వైభవ్
Follow Us On: Instagram
