కలం, వెబ్ డెస్క్: ఐపీఎల్ 2026లో చెన్నై సూపర్ కింగ్స్ (CSK) ప్రదర్శనపై సందేహాలు వ్యక్తమవుతున్నాయి. తాజాగా పంజాబ్ కింగ్స్ (PBKS) చేతిలో ఐదు వికెట్ల తేడాతో ఓడిన తర్వాత, జట్టు వ్యూహాలు విమర్శల కేంద్రంగా మారాయి. ముఖ్యంగా 210 పరుగుల భారీ లక్ష్యాన్ని కూడా కాపాడుకోలేకపోవడం ఇప్పుడు చర్చకు దారితీసింది. ఈ ఓటమికి ముందు రాజస్థాన్ రాయల్స్ మ్యాచ్ తర్వాత సీఎస్కే కొన్ని కీలక మార్పులు చేసింది. గత మ్యాచ్లో టాప్ స్కోరర్గా నిలిచిన జేమీ ఓవర్టన్ను బెంచ్పై పెట్టారు. మ్యాట్ షార్ట్ను కూడా తప్పించి, సర్ఫరాజ్ ఖాన్, అరంగేట్రం చేసిన ప్రశాంత్ వీర్ను జట్టులోకి తీసుకున్నారు. ఈ కాంబినేషన్లో కేవలం ఇద్దరు విదేశీ ఆటగాళ్లే ఉండటం ప్రత్యేకంగా కనిపించింది.
మ్యాచ్ సమయంలో బౌలింగ్ విభాగం ఇబ్బంది పడుతున్నా, ప్రశాంత్ వీర్ను ఒక్క ఓవర్ కూడా బౌలింగ్ చేయించలేదు. అతను బ్యాటింగ్లో 7 బంతుల్లో 6 పరుగులు చేసి నాటౌట్గా నిలిచాడు. అయినప్పటికీ అతని బౌలింగ్ను ఉపయోగించకపోవడం చర్చకు దారితీసింది. ఈ పరిణామాలపై మాజీ భారత క్రికెటర్ రవిచంద్రన్ అశ్విన్ (Ravichandran Ashwin) స్పందించారు. సీఎస్కే తీసుకున్న నిర్ణయాలు ఆశ్చర్యం కలిగించాయని ఆయన అభిప్రాయపడ్డారు. మినీ వేలంలో అనుభవజ్ఞులైన ఆటగాళ్లు అందుబాటులో ఉన్నప్పటికీ యువ ఆటగాళ్లను ఎంపిక చేసిన జట్టు, వారికి తగిన అవకాశాలు ఇవ్వాలని ఆయన సూచించారు. ఆటగాళ్ల ప్రతిభను అంచనా వేయాలంటే వారిని ఆడించాల్సిందేనని అన్నారు. జట్టు ఎంపికలో జరిగిన మార్పులు తనకు తెలిసిన సీఎస్కేలా కనిపించడం లేదని కూడా అశ్విన్ ఆశ్చర్యం వ్యక్తం చేశారు.
ఇదే సమయంలో కెప్టెన్ రుతురాజ్ గైక్వాడ్ జట్టు కాంబినేషన్ను సమర్థించారు. మూడు పేసర్లు, ఇద్దరు స్పిన్నర్లతో మిడిల్ ఓవర్లను నియంత్రించాలనే ప్రణాళికతో బరిలోకి దిగామని తెలిపారు. అయితే స్పిన్నర్లు ఆశించిన స్థాయిలో రాణించకపోవడం వల్ల మ్యాచ్పై పట్టు కోల్పోయామని ఆయన వివరించారు. ఇంపాక్ట్ ప్లేయర్గా రాహుల్ చహర్ను తీసుకున్నప్పటికీ, అతను తన మాజీ జట్టుపై ప్రభావం చూపలేకపోయాడు. నాలుగు ఓవర్లలో 46 పరుగులు ఇచ్చి వికెట్ తీసుకోలేకపోయాడు. ఈ ఓటమితో సీఎస్కే వరుసగా రెండో మ్యాచ్ కోల్పోయింది. తదుపరి మ్యాచ్లో రాయల్ ఛాలెంజర్స్ బెంగళూరుతో తలపడనుంది. ఈ మ్యాచ్ జట్టు పునరాగమనానికి కీలకంగా మారే అవకాశం ఉంది.
