కలం, స్పోర్ట్స్: స్కాటిష్ ప్రీమియర్షిప్ దిగ్గజం రేంజర్స్ కీలక సంతకం చేసింది. సండర్లాండ్ మాజీ కెప్టెన్ డాన్ నీల్ (Dan Neil)ను మూడేళ్ల ఒప్పందంతో జట్టులోకి తీసుకుంది. ఫ్రీ ఏజెంట్గా అందుబాటులోకి వచ్చిన 24 ఏళ్ల మిడ్ఫీల్డర్ ఇకపై గ్లాస్గో క్లబ్ తరఫున బరిలోకి దిగనున్నాడు. సండర్లాండ్ అకాడమీ నుంచి ఎదిగిన డాన్ నీల్.. క్లబ్ తరఫున 201 సీనియర్ మ్యాచ్లు ఆడి 12 గోల్స్ చేశాడు. 2024-25 సీజన్లో జట్టుకు కెప్టెన్గా వ్యవహరించి, చాంపియన్షిప్ ప్లే ఆఫ్ ఫైనల్లో షెఫీల్డ్ యునైటెడ్పై 2-1 విజయంతో సండర్లాండ్ను ఎనిమిదేళ్ల తర్వాత మళ్లీ ప్రీమియర్ లీగ్కు చేర్చడంలో కీలక పాత్ర పోషించాడు.
గత సీజన్ రెండో అర్ధభాగంలో ఇప్స్విచ్ టౌన్కు రుణపద్ధతిపై వెళ్లిన నీల్ 16 చాంపియన్షిప్ మ్యాచ్లు ఆడాడు. ఆ జట్టు కూడా ప్రీమియర్ లీగ్కు ప్రమోషన్ సాధించడంలో తన వంతు పాత్ర పోషించాడు. రేంజర్స్లో చేరడం తన కెరీర్లో కొత్త అధ్యాయమని డాన్ నీల్ చెప్పాడు. ప్రతి వారం గెలవాలనే అభిమానుల అంచనాల మధ్య ఆడటం తనకు ఎప్పుడూ ప్రేరణగా నిలిచిందని తెలిపాడు. రేంజర్స్లో కూడా అలాంటి వాతావరణమే ఉంటుందని ముందే విన్నానని, అందుకే ప్రతి రోజు 110 శాతం శ్రమించేందుకు సిద్ధంగా ఉన్నానని పేర్కొన్నాడు.
రేంజర్స్ మేనేజర్ డెరెక్ మెక్ఇన్నెస్ డాన్ నీల్ను (Dan Neil) జట్టులోకి స్వాగతించాడు. బంతిని సమర్థంగా నియంత్రించే నైపుణ్యం, గోల్స్ చేసే సామర్థ్యం, అపారమైన ఎనర్జీ అతని బలాలని చెప్పాడు. కేవలం 24 ఏళ్ల వయసులోనే మంచి అనుభవం, నాయకత్వ లక్షణాలు సంపాదించిన ఆటగాడని ప్రశంసించాడు. రాబోయే సీజన్ సవాళ్ల కోసం అతనితో కలిసి పనిచేయాలని ఆసక్తిగా ఎదురుచూస్తున్నట్లు వెల్లడించాడు.
