కర్ణాటక రాజకీయాలు సస్పెన్స్ థ్రిల్లర్‌ను తలపిస్తున్నాయి. ముఖ్యమంత్రి మార్పు అంశంలో రోజుకో ట్విస్ట్ చోటు చేసుకుంటున్నది. అసలు అధిష్ఠానం మదిలో ఏముంది? నిజంగానే ఆ రాష్ట్రంలో ముఖ్యమంత్రిని మారుస్తారా? అన్న చర్చ జరుగుతోంది. తాజాగా కాంగ్రెస్ అగ్రనేత రాహుల్ గాంధీ(Rahul Gandhi) .. డీకే శివకుమార్‌కు మెసేజ్ పెట్టడంతో ఈ అంశం మరో మలుపు తీసుకున్నది. సీఎం పదవి రొటేషన్‌ ఫార్ములా ప్రకారం.. డీకే శివకుమార్‌కు ఇవ్వాల్సిందేనని ఆయన వర్గీయులు డిమాండ్ చేస్తున్నారు. కానీ కుర్చీని వదిలేందుకు సిద్దరామయ్య ఒప్పుకోవడం లేదు. అయితే అధిష్ఠానం గట్టిగా చెబితే ఆయన ఒప్పుకొనే అవకాశం లేకపోలేదు. దీంతో ఈ అంశానికి తెర పడటం లేదు.
డీకే శివకుమార్‌(DK Shivakumar) పలుమార్లు రాహుల్‌ను సంప్రదించేందుకు ప్రయత్నించినట్లు పార్టీ సర్కిల్స్‌ చెబుతున్నాయి. దీంతో రాహుల్ గాంధీ(Rahul Gandhi) నుంచి ఒక మెసేజ్ వచ్చింది. “వేచి ఉండండి… నేనే మీకు కాల్‌ చేస్తా” అంటూ రాహుల్ మెసేజ్ పెట్టారు. దీంతో రాహుల్ మదిలో ఏముంది? ఆయన ఏ ఆలోచనతో ఉన్నారు. నిజంగానే ముఖ్యమంత్రిని మారుస్తారా? అన్న చర్చ జరుగుతోంది. డీకే శిబిరం ఈ సందేశాన్ని హైకమాండ్‌ త్వరలోనే కీలక నిర్ణయం తీసుకోబోతుందనే సంకేతంగా భావిస్తోంది. డీకే మరోసారి ఢిల్లీకి వెళ్లేందుకు సిద్ధమవుతున్నట్లు సమాచారం. పర్యటన అసలు ఉద్దేశ్యం వెల్లడికాలేదు. ఆయన సోనియా గాంధీని కలవబోతున్నట్లు పార్టీ అంతర్గత వర్గాలు చెబుతున్నాయి. ఈ భేటీ నాయకత్వ మార్పుకు సంబంధించిందా? లేక మంత్రివర్గ విస్తరణ గురించినా? అన్నది తెలియాల్సి ఉంది. డీకే శివకుమార్‌ మంగళవారం అర్ధరాత్రి పీడబ్ల్యూడీ మంత్రి సతీష్‌ జార్కిహోళితో రహస్యంగా సమావేశమయ్యారన్న వార్తలు మరో సంచలనం రేపాయి. జార్కిహోళి సిద్ధరామయ్య(siddaramaiah)కు దగ్గరగా ఉన్న నేతగా భావించబడుతుండటంతో ఈ అర్ధరాత్రి భేటీకి ప్రత్యేకమైన ప్రాధాన్యం ఏర్పడింది.
సిద్దరామయ్య స్వరంలో మార్పు
తానే ఐదేండ్లు ముఖ్యమంత్రిగా ఉంటానంటూ ఇంతకాలం సిద్దరామయ్య చెబుతూ వచ్చారు. అయితే తాజాగా ఆయన మాట్లాడుతూ కొంత నైరాశ్యం ప్రకటించారు. అధిష్ఠానం ఏ నిర్ణయం తీసుకున్నా తనకు అభ్యంతరం లేదని చెప్పుకొచ్చారు. దీంతో సీఎంను మార్చబోతున్నారన్న వార్తలకు బలం చేకూరింది. నాయకత్వ మార్పుపై జరుగుతున్న చర్చల నేపథ్యంలో మంత్రి జార్కిహోళి, డీకే మధ్య చర్చలు జరగడం గమనార్హం.
డిసెంబర్ 1లోపు నిర్ణయం?
డిసెంబర్ 1లోపే అధిష్ఠానం ఒక నిర్ణయం తీసుకుంటుందని పార్టీ సీనియర్ నేతలు చెబుతున్నారు. అదే రోజు పార్లమెంట్‌ శీతాకాల సమావేశాలు మొదలవుతాయి. అప్పటికి రాష్ట్ర రాజకీయాల్లో అనిశ్చితిని తొలగించాలని హైకమాండ్‌ భావిస్తున్నట్లు తెలుస్తోంది. మరి నిజంగానే కర్ణాటకలో ముఖ్యమంత్రిని మారుస్తారా? ఒక వేళ మారిస్తే సిద్దరామయ్య మౌనంగా అంగీకరిస్తారా? అలకపాన్పు ఎక్కుతారా? అన్న ప్రశ్నలు తలెత్తుతున్నాయి. ఆయనకు డిప్యూటీ సీఎం పదవి ఇస్తారా? అన్న చర్చ కూడా సాగుతోంది. లేదంటే డీకేకు ఇచ్చినట్టు పీసీసీ చీఫ్ పదవి ఇచ్చే అవకాశం కూడా ఉంది. అయితే ఇదే సమయంలో కర్ణాటక రాజకీయాలను సునిశితంగా గమనిస్తున్న బీజేపీ కొత్త ఎత్తుగడలకు తెరలేపే అవకాశం లేకపోలేదు. అందుకే కాంగ్రెస్ అధిష్ఠానం ఈ విషయంలో ఆచీతూచీ వ్యవహరిస్తున్నట్టు కనిపిస్తోంది.
Read Also: తెలంగాణ పేరు మార్చాల్సి వస్తుందేమో: హైకోర్టు
Follow Us on : Pinterest
