భారత రాజ్యాంగ దినోత్సవం(Constitution day) సందర్భంగా ప్రధాని నరేంద్ర మోదీ(PM Modi) దేశ ప్రజల కోసం ఒక విస్తృతమైన బహిరంగ లేఖ రాశారు. ప్రజాస్వామ్య పరిరక్షణలో పౌరుల పాత్ర అత్యంత ముఖ్యమని, రాజ్యాంగం ప్రసాదించిన హక్కులతో పాటు విధులను కూడా ప్రతి ఒక్కరూ నిర్వర్తించాలని ఆయన పిలుపునిచ్చారు. రాజ్యాంగం ద్వారా దేశంలోని ప్రతి పౌరికి ఓటు హక్కు లభించిందని ప్రధాని మోదీ గుర్తుచేశారు. ప్రజాస్వామ్యాన్ని బలోపేతం చేయడంలో ఎన్నికల ప్రక్రియకు వెళ్లి ఓటు వేయడం ఒక పౌరుడి కర్తవ్యమని పేర్కొన్నారు. ప్రభుత్వ పరిపాలనకు సంబంధించిన ప్రతి ఎన్నికలో ప్రజలు తప్పక పాల్గొనాలని, ముఖ్యంగా కొత్తగా ఓటు వేసే యువతలో అవగాహన పెంచాల్సిన అవసరం ఉందని సూచించారు. ప్రతి ఏడాది నవంబర్ 26న పాఠశాలలు, కళాశాలల్లో రాజ్యాంగ దినోత్సవాన్ని నిర్వహించి ఓటు హక్కు, రాజ్యాంగ విలువలను యువతకు పరిచయం చేయాలని ఆయన సూచించారు.
యువతే బలమైన ప్రజాస్వామ్యానికి ఆధారం
యువత రాజ్యాంగ విలువలను గౌరవించి, వాటిని ఆచరణలో పెట్టాలని మోదీ పిలుపునిచ్చారు. “ఈ శతాబ్దం ప్రారంభమై 25 సంవత్సరాలు పూర్తయ్యాయి. రాబోయే రెండు దశాబ్దాల్లో వలస పాలన నుంచి విముక్తి పొంది 100 ఏళ్లు పూర్తవుతాయి. 2049లో రాజ్యాంగ ఆమోదానికి శతాబ్ది పూర్తి అవుతుంది. మనం ఇప్పుడు తీసుకునే నిర్ణయాలే రాబోయే తరాల భవిష్యత్తును తీర్చిదిద్దుతాయి” అని ఆయన అన్నారు. వికసిత్ భారత్‌ లక్ష్యంతో ముందుకు సాగాలని పౌరులకు స్పష్టమైన సందేశం ఇచ్చారు.
రాజ్యాంగం వల్లే ఒక సాధారణ కుటుంబం నుంచి వచ్చిన తానే 24 ఏళ్లకు పైగా ప్రజాసేవలో ఉన్నానని మోదీ అన్నారు. 2014లో తొలిసారి పార్లమెంటుకు వచ్చినప్పుడు సభ మెట్లను తాకి నమస్కరించిన సందర్భం తనకు ఇప్పటికీ మధురస్మరణగా ఉందని చెప్పారు. 2019లో ప్రజలు తనకు మరోసారి అవకాశం ఇచ్చిన తర్వాత సంవిధాన్‌ సదన్‌లో ప్రవేశించే వేళ రాజ్యాంగ ప్రతిని నుదుటన పెట్టుకుని గౌరవం తెలిపిన విషయాన్ని గుర్తుచేశారు.
రాజ్యాంగం పౌరులకు కలలు కనే శక్తి మాత్రమే కాదు, వాటిని సాకారం చేసుకునే అవకాశాలను కూడా ఇస్తుందని ఆయన పేర్కొన్నారు. శతాబ్దాలుగా ఉన్న గాయాలు కోలుకుంటున్నాయని, దేశం వేగంగా అభివృద్ధి దిశగా సాగుతోందని మోదీ భావించారు.
పౌరులందరికీ కర్తవ్య పిలుపు
దేశం అభివృద్ధి చెందాలంటే ప్రతి పౌరుడు తన తన విధులను నిజాయితీగా నిర్వర్తించాల్సిన అవసరం ఉందని ప్రధాని స్పష్టం చేశారు. రాజ్యాంగ నిర్మాతలకు కృతజ్ఞతలు తెలిపిన మోదీ(PM Modi), “మన బాధ్యతలు మనమే భరిస్తేనే భారతదేశం సాధికారతతో ముందుకు సాగుతుంది” అని అన్నారు.
Read Also: అమరావతిలో మాక్ అసెంబ్లీ.. హాజరైన చంద్రబాబు
Follow Us on : Pinterest
