పాకిస్థాన్‌(Pakistan)లో ఉగ్రవాద దాడులు కొనసాగుతున్నాయి. తాజాగా ఖైబర్‌ పఖ్తున్వా ప్రావిన్స్‌లోని పెషావర్‌(Peshawar)లో ఫ్రంటియర్‌ కోర్‌ ప్రధాన కార్యాలయంపై ఆత్మాహుతి దాడి జరిగింది. ఈ దాడిలో ఇద్దరు పారా మిలిటరీ సిబ్బంది మృతి చెందగా, పలువురు గాయపడ్డారు. ఫ్రంటియర్‌ కోర్‌ కార్యాలయం గేట్ వద్ద మొదటి పేలుడు సంభవించింది. దానికి కొద్ది నిమిషాల్లోనే సమీపంలోని సైకిల్‌ స్టాండ్‌ వద్ద మరొక పేలుడు జరిగింది. ఈ వరుస పేలుళ్లతో భద్రతా బలగాలు అత్యవసర చర్యలకు దిగాయి.
దాడి అనంతరం ముగ్గురు ఉగ్రవాదులు కార్యాలయ కాంపౌండ్‌లోకి చొరబడేందుకు ప్రయత్నించినట్లు గుర్తించిన భద్రతా దళాలు వారిపై కాల్పులు ప్రారంభించాయి. ఉగ్రవాదులు కూడా కాల్పులు జరిపారు. ఈ కాల్పుల్లో ఇద్దరు పారా మిలిటరీ సిబ్బంది ప్రాణాలు కోల్పోగా, మరో నలుగురు గాయపడ్డారు. గాయపడిన వారిని సమీప ఆసుపత్రికి తరలించారు.
పేలుళ్ల సమాచారంతోనే రెస్క్యూ బృందాలు, బాంబ్ స్క్వాడ్‌లు ఘటనాస్థలికి చేరుకుని సహాయక చర్యలు ప్రారంభించాయి. పేలుళ్ల తర్వాత ఆ ప్రాంతం మొత్తానికి లాక్‌డౌన్‌ విధించి, పరిసరాల్లో క్షుణ్ణంగా తనిఖీలు నిర్వహిస్తున్నారు. దాడిపై పోలీసులు కేసు నమోదు చేసి దర్యాప్తు ప్రారంభించారు. ఈ ఘటనకు ఇప్పటి వరకు ఏ ఉగ్రవాద సంస్థ బాధ్యత వహించినట్లు ప్రకటించలేదు. ఇటీవల పాకిస్థాన్‌(Pakistan)లో భద్రతా దళాలను లక్ష్యంగా చేసుకుని దాడులు కొనసాగుతున్న విషయం తెలిసిందే.
Read Also: అమెరికా వీసా రద్దు.. వైద్యురాలి ఆత్మహత్య
Follow Us on: Youtube
