కలం, వెబ్ డెస్క్: పారా ఆర్చరీలో మరో సంచలనం చోటు చేసుకుంది. లక్ష్యాన్ని అందుకోవడానికి అంగవైకల్యం ఏమాత్రం అడ్డుకాదని మరోసారి నిరూపితమైంది. పారా ఆర్చరీలో వరల్డ్ ఛాంపియన్గా నిలిచిన శీతల్ దేవిని (Sheetal Devi).. ఒడిశాకు చెందిన 18 ఏళ్ల పాయల్ నాగ్ (Payal Nag) అనే మరో పారా ఆర్చర్ చిత్తు చేశారు. బ్యాంకాక్లో జరిగిన వరల్డ్ ఆర్బరీ పారా సిరీస్లో శీతల్ను ఓడించి పాయల్ నాగ్ స్వర్ణ పతకాన్ని ముద్దాడారు. నాలుగు అవయవాలు లేని ఈ టీనేజ్ ఆర్చర్, తన సహచర క్రీడాకారిణిపై 139-136 తేడాతో విజయం సాధించి అందరినీ ఆశ్చర్యపరిచారు. పాయల్ పసిడి పతకమే హైలైట్గా సాగిన ఈ టోర్నీలో భారత్ ఏడు స్వర్ణాలు సహా మొత్తం 16 పతకాలతో అగ్రస్థానంలో నిలిచింది. అంతర్జాతీయ స్థాయిలో ఇది పాయల్కు కేవలం రెండో టోర్నీ మాత్రమే కావడం విశేషం. గత ఏడాది జైపూర్ పారా నేషనల్స్లో కూడా ఆమె శీతల్ను ఓడించి తన సత్తా చాటింది.
ఈ హోరాహోరీ ఫైనల్ పోరులో పాయల్ ఆది నుంచే పట్టు బిగించింది. తొలి ఎండ్ను 27-25తో దక్కించుకోగా, రెండో ఎండ్ ముగిసేసరికి ఇద్దరూ 54-54తో సమంగా నిలిచారు. అయితే ఒత్తిడిలోనూ అద్భుతమైన ఏకాగ్రత కనబరిచిన పాయల్, మూడో ఎండ్లో 82-80తో ఆధిక్యంలోకి దూసుకెళ్లారు. ఆఖరి ఎండ్లో రెండు పర్ఫెక్ట్ 10లతో మ్యాచ్ను క్లినికల్గా ముగించి విజేతగా నిలిచారు. శీతల్ దేవి చిన్ననాటి కోచ్ కుల్దీప్ వేద్వాన్ శిక్షణలో పాయల్ ఒక గొప్ప ఆవిష్కరణగా నిలిచారు. ఒడిశాలోని ఒక వలస కూలీ కుమార్తె అయిన పాయల్, 2015లో విద్యుత్ తీగ తగిలి తన రెండు చేతులు, రెండు కాళ్లను కోల్పోయారు.
కత్రాలోని స్పోర్ట్స్ కాంప్లెక్స్లో శీతల్ దేవితో కలిసి శిక్షణ పొందిన పాయల్ (Payal Nag), 2025లో జాతీయ స్థాయి అరంగేట్రం చేసినప్పటి నుండి వేగంగా ఎదుగుతున్నారు. ఖేలో ఇండియా పారా గేమ్స్లో రజతం, నేషనల్ ఛాంపియన్షిప్లో కాంస్యం సాధించిన ఆమె, ఇప్పుడు ప్రపంచ వేదికపై స్వర్ణంతో మెరిశారు. ఆసియా పారా గేమ్స్ విజేత, పారా ఒలింపిక్ మెడలిస్ట్ అయిన శీతల్ దేవి వంటి దిగ్గజ క్రీడాకారిణిని ఓడించడం ద్వారా పాయల్ తన అసాధారణ ప్రయాణంలో మరో మైలురాయిని అధిగమించారు. ఈ ఇద్దరు భారత స్టార్ ఆర్చర్లు అంతర్జాతీయ వేదికలపై దేశ గౌరవాన్ని మరింతగా పెంచుతున్నారు.
Read Also: డీలిమిటేషన్ పై ప్రధాని మోదీ సంచలన వ్యాఖ్యలు
Follow Us On: Instagram
