కలం, స్పోర్ట్స్ : వచ్చే నెలలో భారత్ వేదికగా జరగనున్న సాఫ్ (SAFF Championship) మహిళల ఫుట్బాల్ ఛాంపియన్షిప్ 2026 నుంచి పాకిస్థాన్ అధికారికంగా తప్పుకుంది. ఇరు దేశాల మధ్య నెలకొన్న రాజకీయ ఉద్రిక్తతల కారణంగానే ఈ నిర్ణయం తీసుకున్నట్లు పాకిస్థాన్ ఫుట్బాల్ ఫెడరేషన్ (PFF) గురువారం ప్రకటించింది. మే 25 నుండి జూన్ 6 వరకు గోవాలోని పండిట్ జవహర్లాల్ నెహ్రూ స్టేడియంలో ఈ టోర్నీ జరగనుంది. పాక్ వైదొలగడంతో ఇప్పుడు కేవలం ఆరు జట్లు మాత్రమే ఈ పోటీలో తలపడనున్నాయి. భారత్ ఈ టోర్నీకి ఆతిథ్యం ఇవ్వడం ఇది రెండోసారి. గతంలో 2016లో సిలిగురిలో జరిగినప్పుడు భారత్ విజేతగా నిలిచింది. ఇప్పుడు గోవా వేదికగా టోర్నీ నిర్వహించేందుకు దక్షిణ ఆసియా ఫుట్బాల్ ఫెడరేషన్ సిద్ధమైంది. ఇటీవల డాకాలో జరిగిన డ్రా ప్రకారం.. నేపాల్, భారత్, శ్రీలంక, బంగ్లాదేశ్, భూటాన్, మాల్దీవులు రెండు గ్రూపులుగా విడిపోయి పోటీపడతాయి.
నిజానికి పాక్ మహిళా జట్టుకు ఈ టోర్నీ (SAFF Championship) ఒక మంచి అవకాశం. ఎన్నో ఏళ్ల పరిపాలనా పరమైన ఇబ్బందుల తర్వాత ఇప్పుడిప్పుడే నిలదొక్కుకుంటున్న ఆ జట్టుకు ఇది పెద్ద ఎదురుదెబ్బ అని చెప్పాలి. కేవలం ఫుట్బాల్ మాత్రమే కాదు, గత ఏడాది తమిళనాడులో జరిగిన జూనియర్ హాకీ వరల్డ్ కప్ నుండి కూడా పాక్ తప్పుకుంది. అలాగే రాజ్గిర్లో జరిగిన ఆసియా కప్కు కూడా తమ సీనియర్ పురుషుల జట్టును పంపలేదు. రికార్డుల పరంగా చూస్తే భారత్ ఐదుసార్లు ఛాంపియన్గా నిలిచింది. 2010 నుండి 2019 వరకు వరుసగా టైటిల్స్ గెలుచుకుంది. అయితే గత రెండు సీజన్లలో (2022, 2024) బంగ్లాదేశ్ విజేతగా నిలిచింది. క్రీడల్లో రాజకీయ ప్రభావం కారణంగా మరోసారి అభిమానులు భారత్-పాక్ సమరాన్ని కోల్పోతున్నారు. ఈ టోర్నీ షెడ్యూల్ ప్రకారం ప్రశాంతంగా సాగుతుందని నిర్వాహకులు ఆశిస్తున్నారు.
Read Also: భారత రెజ్లింగ్ కోచ్గా షాకో బెంతినీడిస్ కంబ్యాక్ !
Follow Us On: X(Twitter)
