కలం, స్పోర్ట్స్ : మోటోజీపీ (MotoGP) వరల్డ్ ఛాంపియన్ మార్క్ మార్క్వెజ్ (Marc Marquez) ఇటాలియన్ రేసింగ్ బృందం డుకాటీతో తన ఒప్పందాన్ని 2028 సీజన్ చివరి వరకు పొడిగించారు. మంగళవారం ఈ అధికారిక ప్రకటన వెలువడింది. ఈ రేసింగ్ సంచలనం డుకాటీలోనే కొనసాగుతుండటం ఇప్పుడు మోటోజీపీ ప్రపంచంలో అత్యంత హాట్ టాపిక్గా మారింది. స్పానిష్ రేసర్ అయిన 33 ఏళ్ల మార్క్వెజ్, 2024లో డుకాటీ జట్టులో చేరారు. ఆ మరుసటి ఏడాది జపాన్ గ్రాండ్ ప్రిక్స్ గెలిచి, తన కెరీర్లో ఏడో ప్రపంచ ఛాంపియన్షిప్ టైటిల్ను సొంతం చేసుకున్నారు. 2019 తర్వాత ఆయన గెలిచిన మొదటి టైటిల్ ఇదే కావడం విశేషం. ఈ 2026 సీజన్ ప్రారంభంలో కొన్ని పాత గాయాల వల్ల ఆయన కాస్త ఇబ్బంది పడ్డారు.
అయినప్పటికీ భుజం, ఎడమ కాలికి సర్జరీ జరిగిన నెల రోజుల్లోనే హంగేరియన్ గ్రాండ్ ప్రిక్స్లో అద్భుత విజయం సాధించి, తన కెరీర్లో 100వ విజయాన్ని నమోదు చేశారు. ఆ తర్వాత జరిగిన చెక్ గ్రాండ్ ప్రిక్స్ను కూడా ఆయనే గెలుచుకున్నారు. తనకు ఎంతో ప్రశాంతతను ఇచ్చిన డుకాటీ కుటుంబంలోనే కొనసాగడం సంతోషంగా ఉందని మార్క్వెజ్ పేర్కొన్నారు. తనకు ఈ క్రీడ అంటే ఎంతో ఇష్టమని, అందుకే రేసింగ్లో కొనసాగుతున్నానని చెప్పారు. డచ్ గ్రాండ్ ప్రిక్స్కు ముందు లీడర్ మార్కో బెజెచి కంటే మార్క్వెజ్ 40 పాయింట్లు వెనుకబడి ఉన్నారు.
