కలం, వెబ్ డెస్క్: రోగులు కోలుకోవడంలో నర్సులు కీలక పాత్ర పోషిస్తారని మంత్రి వివేక్ వెంకటస్వామి (Minister Vivek) అన్నారు. నర్సులు అందించే ఆత్మవిశ్వాసం, భరోసా వల్ల సగం అనారోగ్యం తగ్గుతుందని ఆయన ఆశాభావం వ్యక్తం చేశారు. ఈ సందర్భంగా ప్రస్తుతం జర్మనీలో పనిచేస్తున్న నర్సులతో మంత్రి ఆన్లైన్లో కూడా మాట్లాడారు. టామ్కామ్ (TOMCOM) నిర్వహిస్తున్న ట్రిపుల్ విన్ ప్రోగ్రామ్ కింద శిక్షణ పొందుతున్న నర్సులతో మంత్రి ముచ్చటించారు. అంతర్జాతీయ ఉద్యోగావకాశాలను సమర్థవంతంగా వినియోగించుకోవాలని వారిని ప్రోత్సహించారు. జర్మనీలో ఉద్యోగావకాశాలు యువతకు ఒక గొప్ప మార్గమని ట్రైనింగ్ తీసుకుంటున్న నర్సులకు దిశానిర్దేశం చేశారు. కొత్త భాషకు, కొత్త వాతావరణానికి అలవాటుపడటంలోని సవాలును తమ ఎదుగుదలకు ఒక అవకాశంగా భావించాలని నర్సులకు సూచించారు.
టామ్కామ్ నర్సింగ్ నిపుణుల కోసం అంతర్జాతీయ స్థాయి ఉద్యోగావకాశాలను సృష్టిస్తోందని మంత్రి (Minister Vivek) అన్నారు. జర్మనీలో ప్రస్తుత బ్యాచ్ సాధించిన విజయం భవిష్యత్తులో మరెంతో మంది అభ్యర్థులకు ద్వారాలు తెరుస్తుందని మంత్రి నొక్కి చెప్పారు. జర్మన్ భాష నేర్చుకోవడంపై తీక్షణంగా దృష్టి పెట్టాలని ఆయన శిక్షణార్థులకు సలహా ఇచ్చారు, అలాగే కమ్యూనికేషన్ స్కిల్స్ ప్రతి ఒక్కరికీ అవసరమని నొక్కి చెప్పారు. ఆన్లైన్ వేదికల ద్వారా ఇప్పుడు విదేశీ భాషలను సులభంగా నేర్చుకోవచ్చని ఆయన పేర్కొన్నారు. నైపుణ్యాభివృద్ధి కోసం నర్సులు ప్రతిరోజూ కనీసం ఒక గంట కేటాయించాలని ప్రోత్సహించారు. జర్మన్ పుస్తకాలను సునాయాసంగా చదవగలిగే స్థాయికి చేరుకోవాలని ఆకాంక్షించారు. తాము పనిచేయబోయే దేశ సంస్కృతిని అర్థం చేసుకోవాలని శిక్షణార్థులను మంత్రి కోరారు. టామ్కామ్ (TOMCOM) కార్యకలాపాల కోసం రాష్ట్ర ప్రభుత్వం బడ్జెట్లో ప్రత్యేక నిధులు కేటాయించిందని ఆయన తెలియజేశారు. రాష్ట్రంలో నర్సింగ్ కళాశాలలు, సీట్ల సంఖ్యను పెంచే అవకాశంపై ముఖ్యమంత్రి రేవంత్ రెడ్డితో చర్చిస్తానని ఆయన హామీ ఇచ్చారు.
Read Also: బ్యానర్లు, ప్లెక్సీల ఏర్పాటు : TVK కీలక ఆదేశాలు!
Follow Us On: Instagram
