కలం, వెబ్ డెస్క్: ఫిఫా ప్రపంచకప్ (FIFA World Cup)లో డిఫెండింగ్ ఛాంపియన్ అర్జెంటీనాను వణికించిన కేప్ వర్డే జట్టుపై ఇప్పుడు ఫుట్బాల్ ప్రపంచం ప్రశంసలు కురిపిస్తోంది. ఈ ఉత్కంఠభరిత పోరు ముగిసిన తర్వాత అర్జెంటీనా కెప్టెన్ లియోనెల్ మెస్సీ (Lionel Messi).. కేప్ వర్డే గోల్కీపర్ వోజిన్హాను కలిసి ఒక ప్రత్యేక సందేశం ఇచ్చారు. ఈ విషయాన్ని వోజిన్హా స్వయంగా వెల్లడించారు. తొలిసారి ప్రపంచకప్ ఆడుతున్న కేప్ వర్డే జట్టు.. బలమైన అర్జెంటీనాను గట్టిగా ఎదుర్కొంది.
ఎక్స్ట్రా టైమ్ వరకు సాగిన ఈ మ్యాచ్లో అర్జెంటీనా 3-2 తేడాతో అతికష్టమ్మీద గెలిచింది. ఈ మ్యాచ్లో కేప్ వర్డే కీపర్ వోజిన్హా ఏకంగా ఎనిమిది గోల్స్ను అడ్డుకుని తన జట్టును రేసులో నిలిపారు. మరోవైపు మెస్సీ ఈ మ్యాచ్లో తన 20వ ప్రపంచకప్ గోల్ను నమోదు చేసి, కిలియన్ ఎంబాపె కంటే రెండు గోల్స్ ఆధిక్యంలోకి దూసుకెళ్లారు. మ్యాచ్ ముగిసిన తర్వాత వోజిన్హా నేరుగా మెస్సీ వద్దకు వెళ్లారు. అప్పుడు మెస్సీ అతడిని గట్టిగా కౌగిలించుకున్నారు.
వోజిన్హా ఆటతీరు చాలా అద్భుతంగా ఉందని మెస్సీ కొనియాడారు. అతడి దేశ ప్రజలు వోజిన్హాను చూసి గర్వపడాలని మెస్సీ చెప్పారు. ఈ మాటలు తన కెరీర్లోనే అత్యంత ప్రత్యేకమైనవని వోజిన్హా పేర్కొన్నారు. ఆ తర్వాత వోజిన్హా మెస్సీకి కృతజ్ఞతలు తెలుపుతూ, ఆయనే అత్యుత్తమ ఆటగాడని అన్నారు. అలాగే జెర్సీలను మార్చుకుందామా అని మెస్సీని అడిగారు. ఇంటర్వ్యూలు ముగిసిన తర్వాత టన్నెల్లో తన జెర్సీని ఇస్తానని మెస్సీ వోజిన్హాకు మాట ఇచ్చారు.
ఇలాంటి క్షణాలు తన గుండెల్లో ఎప్పటికీ నిలిచిపోతాయని వోజిన్హా ఆనందం వ్యక్తం చేశారు. ఈ ఓటమితో కేప్ వర్డే ప్రపంచకప్ ప్రయాణం ముగిసింది. అర్జెంటీనా ప్రిక్వార్టర్స్కు చేరుకుంది. ఏది ఏమైనప్పటికీ, ఎలాంటి అంచనాలు లేకుండా బరిలోకి దిగి డిఫెండింగ్ ఛాంపియన్కు కేప్ వర్డే జట్టు ఇచ్చిన పోటీని అంతర్జాతీయ ఫుట్బాల్ అభిమానులు ఎప్పటికీ మరిచిపోలేరు.
