కలం, మెదక్ బ్యూరో: సిద్దిపేట జిల్లా ఎర్రవల్లి (Erravalli) గ్రామంలో రైతుల భూముల్లో అయిదో రోజు సర్వే కొనసాగింది. ఏడీ సుదర్శన్ రాథోడ్, గజ్వేల్ డివిజన్ రెవెన్యూ ఇన్‌స్పెక్టర్ బానోతు సేవియా నాయక్ ఆధ్వర్యంలో అధికారులు క్షేత్రస్థాయిలో పక్కాగా హద్దులు నిర్ధారించేందుకు నాలుగు ప్రత్యేక బృందాలుగా రంగంలోకి దిగారు. సర్వే నంబర్ 325 పరిధిలో నోటీసులు అందుకున్న 70 మంది రైతులకు సంబంధించిన సుమారు 130 ఎకరాల భూమిలో సర్వే చేశారు. ఇప్పటివరకు మొత్తం 125 మంది రైతులకు సంబంధించిన సుమారు 230 ఎకరాల భూమిలో సర్వే పూర్తయినట్లు అధికారులు వెల్లడించారు. మొత్తం 388.5 ఎకరాల భూమిలో ఖాస్తులో ఉన్న 244 మంది అనుభవదారులు, రైతులకు నోటీసులు జారీ చేశారు.
వివరాలు తెలిపిన రైతులు..
ఈ క్రమంలో రైతులు తమ పొలాల వద్దకు చేరుకుని, ప్రభుత్వం గతంలో అందజేసిన పాత పట్టా పాస్ పుస్తకాలు, ఇతర భూ పత్రాలను అధికారులకు సమర్పించారు. ప్రస్తుతం తాము సాగు చేసుకుంటున్న భూముల సరిహద్దుల వివరాలను క్షుణ్ణంగా వివరించారు. మిగిలిన రైతులకు కొత్తగా నోటీసులు జారీ చేయబోతున్నారు. సర్వే జరుతున్న తీరును గజ్వేల్ ఆర్డీవో చంద్రకళ స్వయంగా పరిశీలించి అధికారులు, రైతులతో మాట్లాడారు. మిగిలిన రైతుల భూముల్లో ఈ వారం సర్వేను కొనసాగించనున్నట్లు అధికారులు తెలిపారు.
