రాష్ట్రంలో శాసనసభ ఎన్నికలు ఎప్పుడు వచ్చినా అధికారం మాదే అనే ధీమాలో ఉన్న గులాబీ పార్టీ.. జూబ్లీహిల్స్ ఫలితంతో పునరాలోచనలో పడిందా? యూరియా వెతలు, అధిక వర్షాలతో పంట నష్టం, ఆరు గ్యారెంటీలు అమలు చేయకపోవడం, ప్రభుత్వం అప్పుల్లో కూరుకుపోవడం, అవినీతి, శాంతిభద్రతలు క్షీణించడం, హైదరాబాద్ బ్రాండ్ ఇమేజ్ దెబ్బతినడం వంటి వాటితో ప్రజలు తీవ్ర ఆగ్రహంగా ఉన్నారని, ఎన్నికలు ఎప్పుడొచ్చినా అధికారం పీఠం మాదే అనే అంటున్న, అనుకుంటున్న గులాబీ పార్టీ డైలమాలో పడిందా? ఆ పార్టీ సారథులు, శ్రేణులు అయోమయంలో ఉన్నారా? స్థానిక ఎన్నికలకు బీఆర్ఎస్ సన్నద్ధత, ప్రణాళిక చూస్తుంటే అదే అనుమానం వస్తోంది. తాజాగా పంచాయతీ ఎన్నికల(Panchayat Elections) భారం మొత్తం పార్టీ ఎమ్మెల్యేలపైనే వేయడం దీనికి మరింత ఊతమిస్తోంది.
ఎంపిక నుంచి గెలుపు వరకు..:
సాధారణంగా పంచాయతీ ఎన్నికలు(Panchayat Elections) పార్టీల గుర్తు మీద జరగవు. కానీ, పాలన ఎలా ఉందో, ప్రభుత్వ వ్యతిరేకత ఏ స్థాయిలో ఉందో తెలుసుకోవడానికి ఈ ఫలితాలు కచ్చితంగా ఉపయోగపడతాయి. అందుకే అధికార, ప్రతిపక్షాలు ఈ ఎన్నికలను ప్రతిష్ఠాత్మకంగా తీసుకుంటాయి. ఈ ఎన్నికల ద్వారా తమ బలాబలాలు ఏ మేర ఉన్నాయో తెలుసుకుంటాయి. ఒక రకంగా చెప్పాలంటే అధికార పార్టీ కంటే ప్రతిపక్షానికే ఈ ఎన్నికలు కీలకం. పార్టీని పునర్నిర్మించడంలో, అధికారంలోకి తేవడంలో తోడ్పడతాయి. ఇంతటి ప్రాముఖ్యం ఉన్న ఈ ఎన్నికల బాధ్యతను బీఆర్ఎస్ పార్టీ పూర్తిగా తమ ఎమ్మెల్యేలపైనే వేసింది.
అభ్యర్థుల ఎంపిక నుంచి, వాళ్ల గెలుపోటముల వరకు పూర్తిగా ఎమ్మెల్యేలదే బాధ్యత అని ఆ పార్టీ వర్కింగ్ ప్రెసిడెంట్ కేటీఆర్(KTR) చెబుతున్నారు. అంటే.. పోటీకి నిలిచే వాళ్లను ఎంపిక చేయడంతోపాటు ప్రచారం, డబ్బు సమకూర్చడం, శ్రేణుల మధ్య సమన్వయం, పల్లెల్లోని పార్టీ అంతర్గత గొడవల సర్దుబాట్లు అన్నీ ఎమ్మెల్యేలు చూసుకోవాల్సిందే. పార్టీ తీసుకున్న ఈ నిర్ణయం ఇప్పుడు కార్యకర్తలు, శ్రేణులను అయోమయానికి గురిచేస్తోంది.
నెగ్గుకురాగలరా?:
ఎన్నికలేవైనా ప్రధాన పాత్ర మాత్రం అంగబలం, అర్థబలందే. అంటే డబ్బు, అధికారానిదే కీలకపాత్ర.ఉద్యమ పార్టీ అయిన బీఆర్ఎస్ కు అభ్యర్థుల విషయంలో ఢోకా లేదు.ప్రచారం చేసుకోగలదు. డబ్బూ సర్దుబాటు చేసుకోగలదు.పదేళ్లు అధికారంలో ఉండడం, ప్రస్తుత ఎమ్మెల్యేల్లో చాలా మంది రెండు, మూడో సారి గెలిచినవాళ్లు కావడంతో డబ్బు విషయం పెద్ద సమస్య కాబోదు. గెలిచినవాళ్లలో చాలామంది ఆర్థికంగా అంతో ఇంతో ఉన్నవాళ్లే. కానీ, చిక్కంతా అధికార బలాన్ని దాటి డబ్బు పంపకం సక్రమంగా జరపడం పైనే. దీనికితోడు కనీసం కేటీఆర్, హరీశ్ రావు వంటివాళ్లు అయినా ప్రచారానికి వస్తే అంతో ఇంతో బీఆర్ఎస్ అభ్యర్థులకు ఉపయోగపడేది. కానీ, అభ్యర్థుల ఎంపిక నుంచి వాళ్ల గెలుపు వరకు భారమంతా ఎమ్మెల్యేలపైన వేయడం అంటే ఒక రకంగా బీఆర్ఎస్ కు ఇబ్బందికర పరిణామమే.
ఇప్పటికే అధినేత కేసీఆర్(KCR).. జూబ్లీహిల్స్ ఎన్నికల ప్రచారానికి రాలేదు.ఇక పంచాయతీ ఎన్నికలకు రారని బీఆర్ఎస్ శ్రేణులు అనుకుంటున్న తరుణంలో తాజాగా పార్టీ తీసుకున్న నిర్ణయం వాళ్లను మరింత నిరాశలోకి నెట్టింది. మరోవైపు ఎమ్మెల్యేలు సైతం అధికార పార్టీకి ఎదురొడ్డి పోరాడగలరా? అనేది ప్రశ్నార్థకమే. అయితే, ఈ ఎన్నికల్లో సత్తా చాటితేనే ఎవరి బలం ఎంతో తెలిసిపోతుందని, ఆయా ప్రాంతాల్లో శాసనసభ ఎన్నికలకు పార్టీని సమర్థంగా నడిపించగలరా లేదా అనేదానికి కొలమానంగా తీసుకోవచ్చని కేటీఆర్ భావిస్తున్నట్లు చెబుతున్నారు.అయితే, పార్టీ ఎమ్మెల్యేలు లేని చోట కేటీఆర్, హరీశ్ రావులు ప్రచారానికి వస్తారని, ఆయా ప్రాంతాలను పర్యవేక్షిస్తారని బీఆర్ఎస్ శ్రేణులు ఆశిస్తున్నాయి.
ఆ పది నియోజకవర్గాల్లో ఎలా? :
గత శాసనసభ ఎన్నికల్లో బీఆర్ఎస్ గెలిచిన స్థానాలు 39. ఇందులో 10 మంది పార్టీ ఫిరాయించారు. అధికార పార్టీ వైపు చేరిపోయారు.దీనిపై కోర్టు జోక్యంతో స్పీకర్ విచారణ జరుపుతున్నారు. ఇదే సమయంలో స్థానిక ఎన్నికలు రావడం ఫిరాయింపు ఎమ్మెల్యేలను కలవరపాటుకు గురిచేస్తోంది. నిజానికి ఎమ్మెల్యేలు కండువా మార్చినప్పటికీ స్థానిక నాయకులు మాత్రం వారి వెంట వెళ్లలేదు. ఈ క్రమంలో తమపై వేటు పడితే ఏంటని ఫిరాయింపు ఎమ్మెల్యేలు ఆలోచనలో పడ్డారు. అధికార పార్టీ ఎలాగూ అండగా ఉంది కాబట్టి, పంచాయతీ ఎన్నికల్లో ఏదో విధంగా నెగ్గుకొచ్చినా.. ఆ ఫలితాలు తిరిగి తాము పోటీ చేసేందుకు ఏమైనా అడ్డంకిగా మారతాయేమోననే ఆందోళన వారిలో నెలకొంది. మరోవైపు ఫిరాయింపు ఎమ్మెల్యేల నియోజకవర్గాల్లో బీఆర్ఎస్ ను ఏకతాటిపై నడిపించే నాయకుడే లేడు. పంచాయతీల్లో పార్టీ స్థానిక నాయకత్వం పనితీరుపైనే ఆ పది నియోజకవర్గాల్లో బీఆర్ఎస్ ఉనికికి కీలకం. మొత్తానికి పంచాయతీ ఎన్నికలపై బీఆర్ఎస్ తీసుకున్న నిర్ణయ ప్రభావం రాష్ట్రవ్యాప్తంగా ఎలా ఉండనుందో మరికొన్ని రోజుల్లో తేలనుంది.
Read Also: హాంకాంగ్ అగ్ని ప్రమాదం.. 128కి చేరిన మృతుల సంఖ్య
Follow Us On : Youtube
