కలం, స్పోర్ట్స్: ఐపీఎల్ 2026 సీజన్లో కోల్కతా నైట్ రైడర్స్ (KKR) పరిస్థితి వర్ణనాతీతంగా మారింది. ఆడిన ఐదు మ్యాచ్ల్లోనూ ఒక్క విజయం కూడా నమోదు చేయలేక, పాయింట్ల పట్టికలో అడుగున నిలిచింది. ఈ ప్రదర్శనతో ఐపీఎల్ చరిత్రలోనే అత్యంత దారుణమైన ఆరంభాన్ని మూటగట్టుకుంది. మంగళవారం చెన్నైలోని చేపాక్ స్టేడియంలో జరిగిన మ్యాచ్లోనూ చెన్నై సూపర్ కింగ్స్ చేతిలో చిత్తుగా ఓడిపోయింది. ఈ క్రమంలోనే కేకేఆర్ పరిస్థితిపై టీమిండియా వెటరన్ స్పిన్నర్ రవిచంద్రన్ అశ్విన్ (Ravichandran Ashwin) విచారం వ్యక్తం చేశారు.
ఈ మ్యాచ్లో టాస్ గెలిచిన అజింక్య రహానే సేన ముందుగా బౌలింగ్ ఎంచుకున్నప్పటికీ.. చెన్నై బ్యాటర్లను కట్టడి చేయడంలో విఫలమైంది. సీఎస్కే నిర్ణీత ఓవర్లలో 192 పరుగులు సాధించింది. ముఖ్యంగా పవర్ప్లేలోనే ఆట ఫలితం తేలిపోయిందని అశ్విన్ విశ్లేషించారు. చెన్నై జట్టు పవర్ప్లేలో 72 పరుగులు చేయగా, కేకేఆర్ కేవలం అందులో సగం అంటే 36 పరుగులు మాత్రమే చేసి వెనుకబడిందని ఆయన గుర్తు చేశారు. సునీల్ నరైన్, ఫిన్ అలెన్ జోడీ ఆశించిన రీతిలో రాణించలేకపోయారు.
గాయం నుంచి కోలుకుని జట్టులోకి వచ్చిన మిస్టరీ స్పిన్నర్ వరుణ్ చక్రవర్తి ప్రదర్శనపై అశ్విన్ ప్రత్యేకంగా స్పందించారు. వరుణ్ తన ఆత్మవిశ్వాసాన్ని కోల్పోయినట్లు కనిపిస్తోందని, ప్రస్తుతం బ్యాటర్లు అతని బౌలింగ్ను సులభంగా అంచనా వేస్తున్నారని అభిప్రాయపడ్డారు. వరుణ్ కొంతకాలం విరామం తీసుకుని తన బౌలింగ్ శైలిపై పని చేయాలని అశ్విన్ సూచించారు. కేకేఆర్ జట్టు ప్రస్తుతం దిక్కుతోచని స్థితిలో ఉందని ఆయన ఆవేదన వ్యక్తం చేశారు.
