కలం, స్పోర్ట్స్ : బ్యాడ్ హోంబర్గ్ ఓపెన్ (Bad Homburg Open) టెన్నిస్ ఫైనల్ పోరు ఊహించని మలుపు తిరిగింది. ఒకవైపు అద్భుతమైన ఫామ్, మరోవైపు అనూహ్యమైన గాయంతో ఈ మ్యాచ్ ముగిసింది. శనివారం జరిగిన టైటిల్ పోరులో స్టార్ ప్లేయర్ నయోమి ఒసాకా (Naomi Osaka) కాలి గాయంతో మధ్యలోనే తప్పుకుంది. దీంతో జెక్ రిపబ్లిక్ క్రీడాకారిణి కరోలినా ముచోవా (Karolina Muchova)ను విజేతగా ప్రకటిస్తూ నిర్వాహకులు ట్రోఫీని అందజేశారు. కేవలం 46 నిమిషాల పాటే సాగిన ఈ మ్యాచ్ పూర్తిగా ముచోవా ఆధిపత్యంతోనే సాగింది. టాస్ గెలిచినప్పటి నుంచే ముచోవా కోర్టులో వీరవిహారం చేసింది.
పవర్ఫుల్ షాట్లతో ఒసాకా సర్వీస్లపై విరుచుకుపడింది. ఒక్కసారిగా 4-0తో ఆధిక్యంలోకి దూసుకెళ్లి మ్యాచ్ను తన గుప్పిట్లోకి తెచ్చుకుంది. ఇదే సమయంలో ఒసాకా కుడికాలి నొప్పితో తీవ్రంగా ఇబ్బంది పడుతూ కనిపించింది. మొదటి సెట్ మధ్యలోనే ఆమె మెడికల్ టైమ్అవుట్ కూడా తీసుకుంది. ఆ తర్వాత ఒసాకా ఒక సర్వీస్ గెలిచినా ముచోవా ఏమాత్రం తగ్గలేదు. మరో బ్రేక్ పాయింట్ సాధించి మొదటి సెట్ను 6-1తో కైవసం చేసుకుంది.
ఇక రెండో సెట్ మొదటి గేమ్లో ముచోవా సర్వీస్ నిలబెట్టుకుని 1-0తో ముందంజలో ఉన్నప్పుడు ఒసాకా ఇక ఆడలేనని సైగ చేసింది. ఈ గెలుపుతో ముచోవా తన కెరీర్లో సరికొత్త రికార్డు సృష్టించింది. గ్రాస్ కోర్టుపై ఆమెకు ఇదే మొదటి డబ్ల్యూటీఏ సింగిల్స్ టైటిల్ కావడం విశేషం. ఈ సీజన్లో దోహా టోర్నీ తర్వాత ఆమెకు ఇది రెండో పెద్ద విజయం. మొత్తంగా ఆమె కెరీర్లో ఇది మూడో సింగిల్స్ ట్రోఫీ. ఈ విజయంతో ఒసాకాపై ముచోవా హెడ్-టు-హెడ్ రికార్డు 3-3తో సమం అయింది.
మరోవైపు 2021 ఆస్ట్రేలియన్ ఓపెన్ తర్వాత తొలి సింగిల్స్ టైటిల్ కొట్టాలన్న ఒసాకా కల మళ్లీ చెదిరిపోయింది. గ్రాస్ కోర్టుపై తొలి టైటిల్ వేటలో ఉన్న ఆమె వరుసగా మూడో ఫైనల్లోనూ రన్నరప్గా మిగిలిపోయింది. మ్యాచ్ ముగిసిన అనంతరం రన్నరప్ ఒసాకా అభిమానులకు క్షమాపణలు చెప్పింది. గాయం వల్ల మ్యాచ్ను పూర్తి చేయలేకపోయినందుకు విచారం వ్యక్తం చేసింది.
