కలం, వెబ్డెస్క్: టోక్యో (Tokyo) వేదికగా జరిగిన ‘వన్ సమురాయ్ 1’ పోరులో ఇంగ్లీష్ స్ట్రైకింగ్ స్టార్ జోనాథన్ హగర్టీ (Jonathan Haggerty) తన సత్తా చాటారు. బుధవారం జరిగిన ఈ ఉత్కంఠ భరిత పోరులో ప్రత్యర్థి యుకీ యోజా (Yuki Yoza) ను మట్టికరిపించి, తన వరల్డ్ బ్యాంటమ్వెయిట్ కిక్బాక్సింగ్ ఛాంపియన్ టైటిల్ను విజయవంతంగా కాపాడుకున్నారు. ఈ మ్యాచ్కు ముందు యుకీ యోజా వరుసగా 13 విజయాలతో ఊపుమీద ఉన్నారు. ముఖ్యంగా ఆయన వేసే ‘కాఫ్ కిక్స్’ అంటే ప్రత్యర్థులకు వెన్నులో వణుకు పుట్టేది. కానీ, రింగ్లోకి దిగిన హగర్టీ ఆ భయాన్ని పటాపంచలు చేశారు. ఐదు రౌండ్ల పాటు సాగిన ఈ పోరులో యోజా అమ్ములపొదిలోని ప్రధాన ఆయుధాలన్నింటినీ హగర్టీ నిర్వీర్యం చేశారు. తనదైన శైలిలో స్పష్టతతో, ఎంతో ఆత్మవిశ్వాసంతో ఆడుతూ యోజాను చిత్తు చేశారు.
విజయం అనంతరం హగర్టీ (Jonathan Haggerty) చాలా సరదాగా స్పందించారు. కాఫ్ కిక్స్ అంటే భయపడే వాళ్ల కోసం ఆయన ఒక చిన్న చిట్కా చెప్పారు. ఆ కిక్లకు భయపడాల్సిన అవసరం లేదని, జిమ్లో కష్టపడాలని సూచించారు. మన వెనుక మంచి కోచ్ ఉంటే వాటిని ఎలా ఎదుర్కోవాలో తెలుస్తుందని, సింపుల్గా ఆ కిక్ తగలకుండా కాలు పైకి ఎత్తితే సరిపోతుందని నవ్వుతూ చెప్పుకొచ్చారు. ఈ విజయంతో హగర్టీ రికార్డు 24-5కు మెరుగుపడింది. తన హయాంలో ఎదురైన అత్యంత కఠినమైన సవాల్ను ఆయన ఎంతో చాకచక్యంగా అధిగమించారని విశ్లేషకులు భావిస్తున్నారు. యోజా లాంటి బలమైన ప్రత్యర్థిని ఓడించడం ద్వారా హగర్టీ మరోసారి తాను ఎందుకు వరల్డ్ ఛాంపియన్గా ఉన్నారో నిరూపించుకున్నారు.
Read Also: రిటైర్మెంట్పై స్టార్క్ క్లారిటీ.. గాయాలు తనను ఆపలేవంటూ రిప్లై!
Follow Us On: Instagram
