కలం, స్పోర్ట్స్ : ఆస్ట్రేలియా టెస్ట్ జట్టు ఆటగాళ్లతో కలిసి భారత యువ పేసర్లు (Indian Young Pacers) నెట్స్లో చెమటోడ్చనున్నారు. యువ ఫాస్ట్ బౌలర్లు అభిషేక్ మూండ్, వాసుదేవ్ ప్రసాద్ సింగ్ వచ్చే వారం ఆసీస్ జట్టుతో కలిసి శిక్షణ తీసుకోబోతున్నారు. బ్రిస్బేన్లోని నేషనల్ క్రికెట్ సెంటర్లో జూలై 13 నుంచి 24 వరకు జరిగే రెండు వారాల హై-పెర్ఫార్మెన్స్ క్యాంప్లో వీరు పాల్గొంటున్నారు. ఈ పర్యటనలో మాజీ పేసర్ టిను యోహానన్, కోచ్ ఎం. సెంథిల్నాథన్ కూడా వీరితో ఉన్నారు.
ఎంఆర్ఎఫ్ పేస్ ఫౌండేషన్, క్రికెట్ ఆస్ట్రేలియా మధ్య 1992 నుంచి ఈ బంధం కొనసాగుతోంది. 1987లో చెన్నైలో ఈ ఫౌండేషన్ మొదలవ్వగా, ఆస్ట్రేలియా దిగ్గజం డెన్నిస్ లిల్లీ సహకారంతో ఈ ఎక్స్ఛేంజ్ ప్రోగ్రామ్ పుట్టుకొచ్చింది. భారత బౌలర్లు ఆసీస్ వాతావరణాన్ని అలవాటు చేసుకోవడానికి, అలాగే ఆసీస్ ఆటగాళ్లు భారత పిచ్లపై పట్టు సాధించడానికి ఈ శిక్షణ ఎంతగానో ఉపయోగపడుతోంది.
మొదట్లో కేవలం ఫాస్ట్ బౌలింగ్ కోసమే ప్రారంభమైన ఈ ప్రోగ్రామ్.. ఇప్పుడు బ్యాటర్లు, స్పిన్నర్లు, వికెట్ కీపర్ల శిక్షణకు కూడా వేదికైంది. గతంలో గ్లెన్ మెక్గ్రాత్, బ్రెట్ లీ, మిచెల్ జాన్సన్ వంటి ఆసీస్ దిగ్గజాలు ఈ ఫౌండేషన్తో పనిచేయగా, భారత స్టార్ పేసర్లు జవగల్ శ్రీనాథ్, జహీర్ ఖాన్ ఇక్కడే రాటుదేలారు. ఇటీవల టాడ్ మర్ఫీ, సామ్ కాన్స్టాస్ లాంటి ఆసీస్ యువ ఆటగాళ్లు కూడా ఈ క్యాంప్ ద్వారా లబ్ధి పొందారు.
ఈ క్రికెట్ బంధం వచ్చే నెలలోనూ కొనసాగనుంది. ఆగస్టు 1 నుంచి రెండు వారాల పాటు ఆస్ట్రేలియా డెవలప్మెంట్ జట్టు చెన్నైలోని ఎంఆర్ఎఫ్ ఫౌండేషన్ను సందర్శించనుంది. ఆసీస్ టాప్ యువ ఆటగాళ్లు ఈ క్యాంప్లో పాల్గొనబోతున్నారు.
