కలం, వెబ్ డెస్క్ : హైదరాబాద్లోని ప్రముఖ ఇంజినీరింగ్ కాలేజీ (VNR College)లో దారుణమైన ఘటన వెలుగులోకి వచ్చింది. చదువుకోవాల్సిన క్లాస్ రూమ్లోనే ఒక విద్యార్థినిపై అదే కాలేజీకి చెందిన ఆశిష్ అనే యువకుడు అఘాయిత్యానికి ఒడిగట్టాడు. గత రెండేళ్లుగా సదరు యువతిని బెదిరిస్తూ ఈ అకృత్యాలకు పాల్పడుతున్నట్లు తెలుస్తోంది. నిందితుడు ఆశిష్ డార్క్ వెబ్సైట్ను అడ్డాగా చేసుకుని, అక్కడ ఆర్డర్ చేసి మరీ మత్తు కలిపిన చాక్లెట్లను తెప్పించినట్లు సమాచారం. ఈ చాక్లెట్లను బాధితురాలికి తినిపించి, ఆమె స్పృహలో లేని సమయంలో నగ్న ఫోటోలు, వీడియోలు తీశాడు.
ఆ ఫోటోలను అడ్డుపెట్టుకుని బ్లాక్మెయిల్ చేస్తూ రెండేళ్ల నుంచి బాధితురాలిపై అత్యాచారానికి పాల్పడుతున్నాడు. అంతేకాకుండా, బాధితురాలు గర్భం దాల్చకుండా ఉండేందుకు ఆమెకు బలవంతంగా గర్భనిరోధక మాత్రలతో పాటు పలు రకాల మత్తు పదార్థాలను కూడా తినిపించినట్లు సమాచారం. ఈ మందులు, మత్తు పదార్థాలను తీసుకోవడం వల్ల బాధితురాలు తీవ్రమైన అనారోగ్యానికి గురైంది. అత్యాచారం జరిగిన విషయం తెలిసినప్పటికీ కాలేజీ యాజమాన్యం పట్టించుకోకపోవడంపై తీవ్ర విమర్శలు వ్యక్తమవుతున్నాయి.
