కలం, వెబ్ డెస్క్ : రియల్ మాడ్రిడ్ స్టార్ స్ట్రైకర్ కిలియన్ ఎంబాపే (Kylian Mbappe) ప్రస్తుతం గాయం నుంచి కోలుకుంటున్నారు. ఈ క్రమంలోనే ఆయన లేనప్పుడు రియల్ మాడ్రిడ్ బాగా ఆడుతుందనే ప్రచారం మొదలైంది. అయితే ఈ వ్యాఖ్యలను బార్సిలోనా కోచ్ హాన్సీ ఫ్లిక్ పూర్తిగా తోసిపుచ్చారు. ఎంబాపే ప్రపంచంలోనే అత్యుత్తమ స్ట్రైకర్ అని, గ్రౌండ్లో అతను చాలా ప్రమాదకరమైన ఆటగాడని ఫ్లిక్ కొనియాడారు. గోల్ పోస్ట్ దగ్గర ఎంబాపేకు తిరుగులేదని, పెనాల్టీ ఏరియా లోపలైనా, బయటైనా అతను అద్భుతంగా ఆడగలడని ప్రశంసించారు.
హ్యామ్స్ట్రింగ్ గాయంతో బాధపడుతున్న ఎంబాపే (Kylian Mbappe), ఈ వారమే శిక్షణలో పాల్గొన్నారు. ఆదివారం బార్సిలోనాతో జరిగే కీలక మ్యాచ్లో ఆయన బరిలోకి దిగే అవకాశం ఉంది. ఈ సీజన్లో ఎంబాపే ఇప్పటివరకు 41 మ్యాచ్ల్లో 41 గోల్స్ చేసి అద్భుతమైన ఫామ్లో ఉన్నారు. మొత్తం మీద రియల్ మాడ్రిడ్ తరపున 100 మ్యాచ్ల్లో 85 గోల్స్ సాధించి తన సత్తా చాటారు.
మరోవైపు బార్సిలోనా మాజీ ప్రెసిడెంట్ జోసెప్ మరియా బార్టోమెయు ఒక ఆసక్తికర విషయాన్ని బయటపెట్టారు. ఒకప్పుడు వినీషియస్ జూనియర్, ఎంబాపే ఇద్దరూ బార్సిలోనా జట్టులో చేరాల్సి ఉందని ఆయన తెలిపారు. వినీషియస్ విషయంలో ముందే ఒప్పందం కుదిరినా, మాడ్రిడ్ మెరుగైన ఆఫర్ ఇవ్వడంతో ఆయన అక్కడికి వెళ్లారని చెప్పారు. అలాగే ఎంబాపే కోసం తాము ప్రయత్నించామని, కానీ ఆ సమయంలో కోచింగ్ స్టాఫ్ డెంబెలే వైపు మొగ్గు చూపడం, పారిస్ సెయింట్ జెర్మైన్ గట్టిగా ప్రయత్నించడంతో ఎంబాపే బార్సిలోనాకు రాలేకపోయారని బార్టోమెయు వివరించారు.
